सबैभन्दा कम उमेरमा बिश्वको सर्वोच्च शिखर सगरमाथा पुगेर विश्व रेकर्ड कायम गरेका शम्भु तामाङको निधन भएको छ । पारिवारिक श्रोतका अनुसार बिहीबार बिहान १० बजेर १३ मिनेटमा क्यान्सर अस्पताल हरिसिद्धिमा उपचार्थ अवस्थामा ६७ बर्षिय तामाङको निधन भएको हो ।
आरोही तामाङ बिगत केहीसमय देखि क्यान्स र प्रोस्टेटको समस्याबाट पीडित रहेका थिए । उनले सन् १९७३ मे ५ तारिखका दिन सगरमाथाको शिखरमा पाइला राख्दा उनको उमेर १७ वर्ष ७ महिना १४ दिनको थियो । सिन्धुपाल्चोक जिल्लाको रिस्याङ्गखुमा जन्मिएका तामाङले १४ वर्षकै उमेर देखि इटाली र युरोपका हिमालहरूमा पर्वतारोहण सम्बन्धी तालिम लिएका थिए । नेपालको पर्वतारोहण तथा पर्यटन क्षेत्रमा विश्वभर किर्तिमान राखेका तामाङ एक वरिष्ठ पर्यटन व्यवसायी, दक्ष आरोही, पर्वतारोहण प्रशिक्षक तथा प्रेरणादायी व्यक्तित्वका रूपमा पर्यटन क्षेत्रमा परिचित व्यक्तित्वकोरूपमा परिचित रहेका थिए । उनकै अवधारण र पहलमा नेपाल पर्वतारोहण संघ स्थापना भएको थियो । स्व. तामाङ सन् १९७३ मा स्थापित नेपाल पर्वतारोहण संघका संस्थापक सदस्य हुन् ।
पर्वतारोहणकै क्रममा स्व. तामाङ सगरमाथा आरोहणद्वारा देशको पहिचान झल्काउने तथा मित्रता बढाउने अभियानको रूपमा सन् १९८८ मा नेपाल–चीन जापान त्रिदेशीय सगरमाथा अभियानका उनी उप–नेता थिए। । नेपाल पर्वतारोहण संघको सल्लाहकार सदस्य रहेका तामाङलाई राज्यले सम्मान स्वरूप सन् २००३ मे ५ मा उनको नाममा एक स्मृति हुलाक टिकट जारी गरेको थियो । पर्वतारोहण संगै सामाजिक कार्यहरूमा पनि सक्रिय रहेका तामाङ सन् १९९२ मा स्थापित तिलगंगा आँखा अस्पतालका संस्थापक सदस्य र पछिल्लो समय कोषाध्यक्ष समेत रहेका थिए ।
विभिन्न राष्ट्रिय अन्तर्राष्ट्रिय पुरस्कार तथा सम्मानबाट विभुषित तामाङ स्वर्गीय राजा वीरेन्द्रबाट पनि सम्मानित भएका थिए । उनी श्रीमती, एक/एक छोरा र छोरीका साथ काठमाडौंको महाराजगञ्जमा बस्दै आएका थिए ।
