सत्तारूढ दल नेपाली कांग्रेसका सभापति शेर बहादुर देउवा राष्ट्रपति हुने गरी गठबन्धनका अर्का सारथी नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ प्रधानमन्त्री हुने गरी सहमति भएको छ ।
देउवा निकट स्रोतका अनुसार पछिल्लो समय उनी राष्ट्रपति हुने गरी प्रचण्डसँग सल्लाह अघि बढेको बताइएको छ ।
‘यसअघि पनि गठबन्धनमा प्रचण्ड पहिला प्रधानमन्त्री उने गरी सहमति बनेको थियो,’ देउवा निकट स्रोतले सूत्रन्यूजलाई भन्यो, ‘बदलिएको परिस्थितिअनुसार प्रचण्ड नै प्रधानमन्त्री बन्नुहुन्छ । तर कांग्रेसको मत सन्तुलनका आधारमा देउवा नै प्रधानमन्त्री बन्ने स्थिति छैन ।’
यसका लागि नेकपा एकीकृत समाजवादीका अध्यक्ष माधवकुमार नेपालले पनि ग्रीन सिग्नल दिइसकेका छन् । उनले गठबन्धन जसरी पनि जोगाएर अघि जानुपर्ने भन्दै प्रचण्ड र देउवालाई प्रतिबद्धता गरिरसकेका छन् ।
देउवा नेतृत्वको गठबन्धन जसरी पनि अघि जोगाएर जाने रणनीति बुझेका नेकपा एमालेका अध्यक्ष केपी शर्मा ओलीले वाम गठबन्धन बनाउने प्रयासस्वरूप बिहीवार नै प्रचण्डलाई फोन गरेर मिलेर जाने प्रस्ताव गरेका थिए ।
प्रचण्डले छलफल त गरौंला तर तपाईले यसअघि गरेका राजनीतिक निर्णयमा पुनर्विचार गर्नुपर्ने भन्ने जवाफ दिएका थिए ।
अहिलेको सत्तारूढ गठबन्धनलाई एकीकृत ढंगले नै अघि बढाउने र अब एमालेलाई सत्तामा आउन नदिने गरी धेरै पहिलादेखि नै संरचना बनाइएको थियो ।
राष्ट्रिय स्वतन्त्र पार्टीको उदयलाई कांग्रेस सभापति देउवाले आफ्नै पार्टीभित्रको अन्तर्घातका रूपमा लिएका छन् ।
