धनुषा। धनुषाकी आरती साह मृत्यु प्रकरणको अनुसन्धान गर्न नेपाल प्रहरीले गठन गरेको उच्चस्तरीय छानबिन समितिले काम सुरु गरेको छ । नायब महानिरीक्षक विकास खनालको नेतृत्वमा पाँच सदस्यीय छानबिन समिति बनाएर आरती मृत्यु प्रकरणबारे सुक्ष्म अनुसन्धान थालिएको प्रहरीले जनाएको छ ।
समितिले घटनास्थल, मृतकका माइती तथा ससुराली पक्षका आफन्त, छिमेकी, आरेक नेपालका प्रतिनिधिलगायतसँग जानकारी लिएको छानबिन समितिका सदस्य वरिष्ठ प्रहरी उपरीक्षक शेखर खनालले जानकारी दिए ।
आरतीका आमाबुबासहित आफन्तले घटनाको निष्पक्ष छानबिनको माग गर्दै काठमाडौंस्थित माइतीघर मण्डलामा लामो समयदेखि धर्ना दिँदै आएका थिए । आरतीको हत्या गरिएको भन्दै छानबिन गर्न उनीहरूको माग छ । दाइजो नल्याएको निहुँमा सासू रेणुदेवी, ससुरा मदनमोहन, श्रीमान् मोतीबाबु र देवर रविले निर्घात कुटपिट गरी छोरीको हत्या गरेको आरोप आरतीका माइती पक्षले लगाएको छ ।
मृतकका ससुराली पक्षले आरतीले आत्महत्या गरेको दाबी गरेका छन् । प्रहरीले दुई जनालाई नियन्त्रण लिएर अनुसन्धान गरिरहेको जनाएको छ ।
गत ७ जेठमा २२ वर्षीया आरती मृत्यु फेला परेकी थिइन् ।
