काठमाडौँ । इङ्लिस प्रिमियर लिग फुटबलमा लिभरपुलले वेस्ट ह्याममाथि शानदार जित निकालेको छ । आईतबार एनफिल्डमा लिभरपुलले वेस्ट ह्याममाथि ३–१ को जित निकालेको हो ।
खेलको १६ औं मिनेटमा मोहमद सलाहले गोल गर्दै लिभरपुललाई अग्रता दिलाएका थिए । पाहुना टोलीका जारोड बोबेनले ४२ औं मिनेटमा गोल गर्दै खेल बराबरीमा ल्याएका थिए ।
नुनेजले ६० औं मिनेटमा लिभरपुलको अग्रता २–१ को बनाए । खेल सकिन ५ मिनेट अघि जोटाले गोल गर्दै लिभरपुललाई ३–१ को जित दिलाए ।
लिभरपुलले आफ्नो अपराजित यात्रालाई १८ खेलसम्म पुर्याएको छ । जित सहित लिभरपुलले ६ खेलबाट १६ अंक बनाएको छ । वेस्ट ह्यामको १० अंक छ ।
अर्को खेलमा घरेलु मैदानमा आर्सनलले टोटेनहमसँग २–२ गोलको बराबरी खेल्दै अंक बाँड्यो ।
खेलको २६ औं मिनेटमा रोमेरोको आत्मघाति गोलमा आर्सनलले खेलमा अग्रता बनाएको थियो । टोटेनहमका कप्तान सन ह्युङ मिनले ४२ औं मिनेटमा खेल बराबरीमा ल्याएका थिए ।
दोस्रो हाफमा बुकायो साकाले पेनाल्टीमार्फत पुन आर्सनललाई अघि बढाएका थिए । लगत्तै कप्तान मिनले टोटेनहमका लागि गोल गर्दै खेल बराबरीमा ल्याए ।
बराबरीसँगै आर्सनल र टोटेनहमले ६ खेलबाट समान १४ अंक जोडको छन् ।
