काठमाडौं । उपप्रधान तथा गृहमन्त्री नारायणकाजी श्रेष्ठ र काठमाडौंका मेयर बालेन्द्र शाहबीच भेटवार्ता भएको छ । शनिबार गृहमन्त्री श्रेष्ठ मेयर बालेनलाई भेट्न उनकै निवास लाजिम्पाटमा पुगेका थिए ।
बालेन निवासमा गृहमन्त्रीलाई दिवाभोज गराइएको थियो । बालेन पत्नि सबिना काफ्लेले सामाजिक सञ्जाल फेसबुकमार्फत गृहमन्त्रीसँगको तस्बिर सार्वजनिक गर्दै गृहमन्त्रीलाई लञ्चमा बोलाउन पाउँदा खुसी लागेको बताएकी छन् ।
स्वकीय सचिव सुशन कर्माचार्यासहित मेयरको सरकारी निवासमा पुगेका श्रेष्ठलाई मेयर शाह दम्पत्तीले स्वागत गरेका थिए । मेयर निवासमा खाना खाएर तिहारको शुभकामना साटासाट गरिएको थियो ।
गृहमन्त्री श्रेष्ठ र बालेनबीच पछिल्लो समय सम्बन्ध चिसिएको विश्लेषण गरिएको थियो । सिंहदरबारमा आगो लगाउने बालेनको चेतावनीपछि दुईबीच संवादसमेत हुन सकेको थिएन ।
बालेन पत्नि सबिना अस्पतालबाट फर्किने क्रममा ट्राफिक प्रहरीले रोकेपछि बालेनले सिंहदरबारमा आगो लगाउने चेतावनी दिएका थिए ।
