काठमाडौं । प्रहरीले मेडिकल व्यवसायी दुर्गा प्रसाइँ समूहका ८ जना पक्राउ गरेको छ । बिहीबार बल्खुमा भएको प्रदर्शनको क्रममा प्रहरीमाथि ढुंगामुढा गरेको भन्दै पक्राउ गरेको हो ।
जिल्ला प्रहरी परिसर काठमाडौंले ८ जनालाई विभिन्न ठाउँबाट नियन्त्रणमा लिएको एसएसपी भुपेन्द्र खत्रीले जानकारी दिएका छन् ।
पक्राउ पर्नेमा शाही युवा शक्तिका अध्यक्ष पशुपति खड्का सहित ८ जना छन् । खड्का काठमाडौँको फुटुङबाट पक्राउ परेका हुन् ।
शान्तिपूर्ण रुपमा भइरहेको प्रदर्शनमा उनीहरुले एक्कासी प्रहरीमाथि आक्रमण गरेकाले पक्राउ गरिएको प्रहरीले जनाएको छ। प्रसाईंको अगुवाईमा बिहीबार भएको प्रदर्शनमा पाँच प्रहरीसहित २८ जना घाइते भएका थिए।
प्रसाईं समूहले शुक्रबारदेखि तिनकुनेमा प्रदर्शन गर्ने बताएको छ। यद्यपि जिल्ला प्रशासन कार्यालय काठमाडौंले अनुमति नभएको ठाउँमा प्रदर्शन गरे कारबाही गर्ने बताएको छ।
