काठमाडौं । नेकपा (एमाले)का अध्यक्ष केपी शर्मा ओलीले नेपाली कांग्रेसका सभापति शेरबहादुर देउवासँग टेलिफोन संवाद गरेका छन् । मध्य पहाडी लोकमार्ग यात्राका क्रममा डडेलधुरा पुगेका उनले देउवासँग टेलिफाेन संवाद गरेका हुन् ।
देउवालाई फोन गरेको भिडियो उनले सामाजिक सञ्जाल फेसबुकमार्फत् सार्वजनिक गरेका छन् । देउवालाई ‘जय नेपाल’ भनेर सम्वाद सुरु गरेका उनले गन्यापधुराको छेउबाटै फोन गरेको बताएका छन् ।
“गन्यापधुराको छेउबाटै फोन गरेको, यतातिर राम्रै छ ? तपाईंको जिल्लामा आएको बेला यसो सम्झिएको नि ! अनि त्यता सबै राम्रो छ नि !”, उनले देउवासँगकाे संवादमा भनेका छन् ।
एमालेको झुलाघाट-चिवा भञ्ज्याङ मध्य पहाडी लोकमार्ग यात्राका क्रममा ओली सुदूरपश्चिम पुगेका हुन् । ‘सम्बन्ध स्थानीय, सन्देश राष्ट्रिय’ भन्ने नाराका साथ बिहीबार बैतडीको झुलाघाटमा अध्यक्षओलीले अभियानको उद्घाटन गरेका थिए ।
अभियान उद्घाटनसँगै उनी डडेल्धुरा पुगेका छन् । डडेल्धुरा नेपाली कांग्रेसका सभापति शेरबहादुर देउवाको गृहजिल्ला हो । डडेल्धुरा पुगेपछि उनले देउवालाई फोन गरेका हुन् ।
