काठमाडौं । नेपाली कांग्रेसभित्र फेरि धर्मको एजेन्डाले प्राथमिकता पाएको छ । महासमिति बैठकसँगै कांग्रेसले धर्मको सन्दर्भमा कित्ता स्पष्ट पार्ने धेरैको अनुमान छ । हालसम्मको छलफल र तयारीलाई हेर्दा कांग्रेस फेरि हिन्दु राष्ट्रको पक्षमा उभिने अड्कल गर्न सकिन्छ ।
हिन्दु राष्ट्रको पक्षमा छलफल चलाउन केन्द्रीय समितिका केही नेताहरुले समूहगतरुपमै लिखित प्रस्ताव तयार गरेका छन् । केन्द्रीय सदस्य शंकर भण्डारीको नेतृत्वमा कांग्रेसका २२ केन्द्रीय सदस्यले हस्ताक्षरसहित नै प्रस्ताव दर्ता गराएका छन् । जहाँ केही प्रभावशाली नेताहरु पनि सहभागि छन् ।
नेताहरुले ९४ प्रतिशतभन्दा बढी हिन्दुहरु रहेको मुलुकमा धर्म निरपेक्षता लाद्न नमिल्ने तर्क प्रस्तावमा राखेका छन् । जसरी कांग्रेस धर्म निरपेक्षताको पक्षमा उभियो यो जनभावना विपरित रहेको नेताहरुको तर्क छ ।
“कांग्रेस जस्तो व्यापक जनआधार भएको प्रजातान्त्रिक पार्टीले नेपाली भूमिमा पादुर्भाव भएको बौद्ध एवम् किरात धर्म, दर्शन, संस्कृतिसहित ९४ प्रतिशत भन्दाबढी वैदिक सनातन हिन्दूधर्म र संस्कृतिमा आस्था र विश्वास राख्ने जनताको भावनालाई पूरै उपेक्षा गरी राष्ट्रिय एकताका आधार, आपसी सद्भाव, सहिष्णुता, सहअस्तित्वको अभ्यासमा खलल पुग्ने गरी नेपाली कांग्रेस धर्म निरपेक्षताको पक्षमा उभिनु ठिक थिएन”, प्रस्तावमा भनिएको छ ।
भण्डारीको नेतृत्वमा दर्ता गरिएको प्रस्तावप्रति कांग्रेसमा शीर्ष तह पनि सकारात्मक देखिन्छ । स्वयम् सभापति शेरबहादुर देउवा पनि भण्डारीको प्रस्तावको पक्षमा देखिएको नेताहरु बताउँछ । सभापति देउवाले यसअघि नै सार्वजनिकरुपमा हिन्दु राष्ट्रको एजेन्डामाथि छलफल आवश्यक भएको बताएका थिए ।
धर्मको एजेन्डाले जबरजस्त प्राथमिकता पाइरहँदा धर्मकै एजेन्डाले कांग्रेस भने विभाजित बनेको छ । पार्टीलाई हिन्दु राष्ट्रको पक्ष उभ्याउन तयारी चलिरहेकै बेला पार्टीकै केही संगठनहरु भने खुलेर विरोधमा आएका छन् । आदिवासी जनजाति विभाग, लोकतान्त्रिक आदिवासी महासंघ र मुस्लिम संघले भण्डारी नेतृत्वको प्रस्तावप्रति आपत्ति जनाएका छन् । तीन संगठनले संयुक्त विज्ञप्ति नै जारी गर्दै पार्टीभित्र सुरु भएको धर्मको बहसको विरोध गरेका हुन् ।
लोकतान्त्रिक गणतन्त्र, संघीयता, धर्म निरपेक्षता, समानुपातिक समावेशी प्रणालीको कार्यान्वयनको नेतृत्व कांग्रेसले गर्नुपर्ने उनीहरुको माग छ । महासमिति बैठकमा यस्ता एजेन्डालाई समावेश नगराउन पनि उनीहरुले अपिल गरेका छन् ।
धर्मको विषयमा उठेको बहस पार्टीको विचार र सिद्धान्तविपरीत भएको आदिवासी जनजाति तथा मुस्लिम समुदायको भनाई छ ।
‘नेपाली कांग्रेसको नेतृत्वमा प्राप्त भएका उपलब्धिहरुलाई संस्थागत गर्नुपर्ने समयमा प्रतिगमन गर्न खोज्नु पार्टी, जनता र मुलुककै लागि दुर्भाग्य हो,’ विज्ञप्तिमा भनिएको छ, ‘नेपाली कांग्रेसको यस ऐतिहासिक महासमिति बैठक २०८० मा संविधान एवम् पार्टीको नीति, विचार र सिद्धान्त विपरित हुनेगरी कुनै निर्णय नगर्न नेतृत्वको गम्भीर ध्यानाकर्षण गराइन्छ।’
साथै, नेपाली जनताको आन्दोलनबाट प्राप्त उपलब्धिहरु लोकतान्त्रिक गणतन्त्र, संघीयता, धर्मनिरपेक्षता र समानुपातिक समावेशी प्रणालीलाई अविछिन्न राख्दै यसको कार्यान्वयन गर्न पनि नेपाली कांग्रेसले नेतृत्व गर्नुपर्ने बताएका छन्।
