काठमाडौँ । नेपाल क्रिकेट संघ (क्यान)को आयोजनामा जारी पहिलो संस्करणको नेपाल प्रिमियर लिग (एनपीएल) भोलि आइतबार दुई खेल हुँदै छ ।
भोलि पहिलो खेल जनकपुर बोल्ट्सले लुम्बिनी लायन्ससँग प्रतिस्पर्धा गर्ने भएको छ । बिहान ९ः१५ बजेदेखि सुरु हुने खेलमा जनकपुर आफ्नो अपराजित यात्रा कायम राख्ने लक्ष्यमा मैदान उत्रिने भएको छ ।
यता, लुम्बिनीले लगातार हारको सामनाबाट जोगिते प्रयास गर्ने छ । यसका लागि लुम्बिनीले आफ्नो पहिलो जित निकाल्ने लक्ष्यमा मैदान उत्रने छ ।
अनिल साहको कप्तानीमा जनकपुर बोल्ट्सका लागि कप्तान साहसँगै मार्की खेलाडी आशिफ शेख, लाहिरु मिलन्था, राशिद खान र ललित राजवंशीले अब्बल प्रदर्शन गरिरहेका छन् । नेपाली राष्ट्रिय क्रिकेट टोलीका नियमित कप्तान रोहित पौडेल नेतृत्वको लुम्बिनी लायन्सले खराब प्रदर्शन गरिरहेको छ ।
आइतबारको दोस्रो खेलमा दिपेन्द्र सिंह ऐरी नेतृत्वको सुदूरपश्चिम रोयल्स र चितवन राइनोज आमने सामने हुँदै छन् । एनपीएलको जारी सिजनमा जनकपुरपछि सुदूरपश्चिमले पनि आफ्नो अपराजित यात्रा जारी राख्दै आएको छ ।
