काठमाडाैं । साउथ सुपरस्टार अल्लु अर्जुनको फिल्म ‘पुष्पा २’ ले बक्स अफिसमा धमाका मच्चाएको छ । तर, यहीबिच फ्यानको मृत्युको घटनाले दुखित बनाएकाे छ ।
हैदराबादको सन्ध्या थिएटरमा भएकाे भागदाैडमा एक फ्यान महिलाकाे मृत्यु भएकाे एक साता नबित्दै आन्ध्र प्रदेशमा सोमबार म्याटिनी शोका क्रममा ३५ वर्षीय एक पुरुष मृत फेला परेका छन् । यस सम्बन्धमा प्रहरीले अनुसन्धान सुरु गरेको छ ।
भारतीय प्रहरीले सञ्चारमाध्यमलाई जनाएअनुसार ३५ वर्षीय हरिजन मदनप्पालाई थिएटरको सफाई कर्मचारीले सोमबार साँझ ६ बजे मृत फेला पारेका थिए। उनी फिल्मको म्याटिनी शो हेर्न दिउँसो २ः३० बजे गएकाे बताइएकाे छ । सँगै उनी मादक पदार्थ सेवन गरी गएकाे पनि प्रहरीले जनाएकाे छ । यद्दपि, उनको मृत्युको कारणबारे प्रहरी स्पष्ट छैन ।
फ्यानको मृत्युबारे विज्ञप्ति जारी गर्दै प्रहरीले मृतकको मृत्यु कहिले र कसरी भयो भन्नेबारे अहिलेसम्म केही खुल्न नसकेको बताएको छ । मृतक चार सन्तानका बाबु हुन् । उनलाई रक्सीको लत थियो । उनी मादक अवस्थामा थिएटरमा आएका थिए ।
यति मात्र होइन, उनले थिएटरभित्र रक्सी पनि पिए । प्रहरीले हाल मुद्दा दर्ता गरेको छ ।
हैदरावादकाे घटनापछि फिल्मका अभिनेता अल्लु अर्जुन र पुष्पा २ निर्देशक सुकुमारले पनि माफी मागेका थिए । साथै, अल्लु अर्जुनले २५ लाख रुपैयाँ दिने घोषणा पनि गरेका थिए । एजेन्सीबाट
