नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आफ्ना नेता तथा कार्यकर्तालाई प्रधानमन्त्री शेरबहादुर देउवा नेतृत्वको सरकारलाई जसरी पनि सफल पार्नुपर्ने निर्देशन दिएका छन् ।
शुक्रवार पार्टी केन्द्रीय कार्यालय पेरिसडाँडामा आयोजित स्थायी कमिटी बैठकमा बोल्दै प्रचण्डले प्रतिगमन परास्त भएर बनेको नयाँ सरकार असफल भए त्यसको जस आफूमाथि आउने भन्दै कडा रुलिङ गरेका हुन् ।
‘हामीले निकै मेहेनेत गरेर संसद र संविधान जोगाएका छौं । कांग्रेसकै नेतृत्वको सरकार भएपनि हामीले यसलाई सफल बनाउने अभियान छेड्नुछ,’ प्रचण्डको भनाइ उदृत गर्दै एक नेताले भने ।
प्रचण्डले सरकारविरोधीहरूसँग कडा टक्कर लिएर अघि बढ्नुपर्नेसमेत बताए ।
बैठक सकिएपछि प्रवक्ता नारायणकाजी श्रेष्ठले सञ्चारकर्मीसँग भने – ‘यो चार महिनाको अवधिमा राजनीतिक रुपमा बाम-लोकतान्त्रिक सहकार्यको सरकारलाई सफल बनाउने, संविधानको रक्षा र कार्यान्वयन गर्ने, अरु सबै प्रकारका राष्ट्रियतालाई कमजोर पार्ने प्रवृत्ति विरुद्धको संघर्षलाई अघि बढाउने दिशामा अघि बढन अध्यक्ष कमरेडले निर्देशन दिनुभएको छ ।’
माओवादी केन्द्रको केन्द्रीय कमिटी बैठक शनिवारदेखि शुरू हुँदैछ । प्रचण्डले बैठकमा राजनीतिक तथा सांगठानिक प्रतिवेदन पेश गर्नेछन् ।
बैठकले सरकारमा सामेल हुने मन्त्रीहरूका बारेमा भने कुनै छिनोफानो गर्न सकेन । ‘कुरा उठेको थियो, तर त्यो निष्कर्षमा पुग्न सकेन,’ एक स्थायी कमिटी सदस्यले सूत्रन्यूजसँग भने ।
मन्त्री छान्ने जिम्मा अध्यक्ष प्रचण्डकै रहेको उनले बताए । ‘केही मापदण्डमा सहमति भएको छ, त्यही मापदण्डअनुसार अध्यक्ष कमरेडले मन्त्री छान्नुहुन्छ,’ उनले भने ।
