शुक्रवार पनि सर्वोच्च अदालत परिसरमा नेपाल बार एसोसियसनका कानून व्यवसायी र प्रहरीबीच घम्साघम्सी भएको छ ।
प्रधानन्यायाधीश चोलेन्द्रशमशेर जबराको राजीनामा माग गर्दै बारका कानून व्यवसायीहरू धर्नामा बस्न खोजेपछि प्रहरीले तितरबितर गर्ने प्रयास जारी राखेको छ ।
यसअघि नियमित रूपमा धर्नामा बसेका कानून व्यवसायीलाई प्रहरीले आज सर्वोच्च परिसरमा जान दिएको छैन । कानून व्यवसायी धर्ना बस्न भित्र जान खोजेको भएपनि प्रहरीले उनीहरूलाई रोकिरहेको छ ।
बिहीवार कानून व्यवसायी र प्रहरीबीच भएको झडपमा बारका अध्यक्ष चण्डेश्वर श्रेष्ठसहित आधा दर्जन कानून व्यवसायी घाइते भएका थिए । बारले विज्ञप्ति निकालेर यसको भर्त्सना गरेको छ ।
बारले शुक्रवारसम्म जबराको राजीनामा नआए आन्दोलनका थप कार्यक्रमहरू गर्ने चेतावनी दिइरहेको छ । तर जबरा भने टसको मस देखिन्नन् ।
प्रतिक्रिया दिनुहोस्
