चितवनमा आजदेखि शुरु भएको नेकपा एमालेको दशौँ महाधिवेशनको उद्घाटन समारोहमा विदेशी पाहुनाका रूपमा भारतीयलगायत अन्य आधा दर्जन देशका प्रतिनिधि मात्र उपस्थित हुने भएका छन् ।
पार्टी कार्यालयबाट प्राप्त जानकारीअनुसार यो समाचार टिप्पणी तयार गर्दासम्म चीनबाट शुभकामना सन्देश आएको छ भने निम्ति पठाइएका अन्य कतिपय देशमध्ये अमेरिका र उत्तर कोरियाबाट सन्देशसमेत आएको छैन ।
भारत, बंगलादेश, श्रीलंका र कम्बोडियाका प्रतिनिधि कोही बिहीवार नै चितवन आइसकेका छन् भने कोही आउने क्रममा रहेका छन् ।
अध्यक्ष केपी शर्मा ओलीले दर्जन भन्दा बढी देशका प्रतिनिधिहरू आफ्नो दलको महाधिवेशनमा आउने दाबी गरेका थिए ।
एमालेको महाधिवेशनमा चीनले आफ्ना प्रतिनिधि नपठाउनुलाई महत्त्वपूर्ण ढंगले हेरिएको छ । कोरोना भाइरसका कारण आफूहरू उपस्थित हुन नसक्ने जानकारी चीनले दिएको छ ।
भारतबाट भने सरकार, प्रमुख प्रतिपक्षी दल भारतीय राष्ट्रिय कांग्रेस र भारतीय कम्युनिस्ट पार्टीका प्रतिनिधीसमेत आउनेछन् ।
एमालेले उत्तर कोरियालाई पनि सहभागी हुन निम्तो पठाएको थियो । तर उद्घाटन सत्र शुरू हुने बेलासम्म पनि कोरियाबाट कोही प्रतिनिधि आएको छैन । कोरियाबाट शुभकामना सन्देशसमेत आएको छैन ।
त्यस्तै अमेरिकी प्रतिनिधिहरू पनि एमालेको महाधिवेशनमा उपस्थित हुने छैनन् । अमेरिकाबाट शुभकामना सन्देशसमेत अहिलेसम्म नआएको नेताहरू बताउँछन् ।
एमालेले नेकपा एकीकृत समाजवादी दललाई निम्तो गरेको छैन । ‘अवैध गर्भाधानबाट जन्मिएको पार्टी’ भन्दै एमालेले नेकपा एसलाई नबोलाएको हो ।
प्रधानमन्त्री शेरबहादुर देउवा उद्घाटन सत्रमा जाने कार्यक्रम रहेको छ भने नेकपा माओवादी केन्द्रका अध्यक्ष पुष्पकमल दाहाल पनि उपस्थित हुने छैनन् ।
उनी पूर्व निर्धारित कार्यक्रमका लागि भन्दै काभ्रे जाने कार्यक्रम रहेको छ । अन्य दलका नेता भने महाधिवेशनको उद्घाटन सत्रमा उपस्थित हुनेछन् ।
महाधिवेशनमा आयोजक समितिसहित २ हजार ३ सय प्रतिनिधि उपस्थित हुनेछन् । उद्घाटन समारोह साढे १२ बजे शुरू हुनेछ ।
