राष्ट्रिय प्रजातन्त्र पार्टीका अध्यक्ष कमल थापाले केपी शर्मा ओलीले नेतृत्व गरेको एमालेबाट देशले साहसिक निर्णयको अपेक्षा गरेको बताएका छन् ।
चितवनमा आयोजित दशौँ महाधिवेशनको उद्घाटनमा सम्बोधन गर्दै थापाले ओलीले राष्ट्रिय स्वाभिमान जोगाउन महत्त्वपूर्ण कदम चालेकाले देशमा देखिएको संकटबाट पार लगाउन महत्त्वपूर्ण निर्णयको अपेक्षा गरेको बताए ।
सम्बोधनका क्रममा थापाले व्यक्त गरेको विचार उनकै शब्दमा –
२०६३ सालको राजनीतिक परिवर्तनपश्चात दिगो शान्ति र स्थायी समृद्धिको लक्ष्य बोकेर हामीले राजनीतिक यात्रा प्रारम्भ गर्यौं । हामी कहाँ जान हिँडेका थियौं, कहाँ आयौं यसलाई गम्भीर समीक्षा गर्नुपर्छ ।
लोकतन्त्रको आवरणमा बिस्तारै देश सर्वसत्तावादतर्फ उन्मुख हुन लागेको पाइन्छ । योजनाबद्ध र संगठित रूपमा गरिदै आएको धर्मपरिवर्तनले हाम्रो सनातन धार्मिक पहिचानलाई समाप्त पार्ने प्रयास भइरहेको छ ।
अहिले सर्वाधिक भ्रष्टाचार व्याप्त भएको छ । ४० लाख भन्दा बढी नेपाली युवाहरू मलेसिया र अरबमा रगत पसिना बगाउन बाध्य भएका छन् ।
नेपालमा अहिले बाह्य शक्तिहरूको चलखेल र प्रभाव तीव्र रूपले बढेर गएको छ । नेपाल अन्तर्राष्ट्रिय शक्तिहरूको रणनीतिक प्रतिस्पर्धास्थल बन्न सक्ने खतरा देखिएको छ । देशले तपाईंहरूबाट साहसिक निर्णयको अपेक्षा गरेको छ ।
ओली जस्तो एउटा दृढ अडान र राष्ट्रवादी सोच भएको नेताले नेतृत्व गरेको पार्टीले यो देशलाई संकटबाट मुक्त तुल्याउनका निम्ति ऐतिहासिक योगदान पुर्याउन सक्नेछ । अध्यक्ष केपी ओलीसँग एउटा सरकारमा रहेर मैले पनि केही समय काम गर्ने अवसर पाएको थिएँ । जतिबेला ओलीको नेतृत्वमा हामी सरकारमा सहभागी भयौं, देशमा आन्दोलनको आगो बलिरहेको थियो ।
भारतीय नाकाबन्दीले कष्ट भोग्नुपरेको थियो । ओलीको सुझबुझ र मार्गदर्शनमा रहेर हामीले राष्ट्रिय स्वाभिमानमा एक इन्च पनि आँच आउन नदिन सफल भयौं । उहाँकै नेतृत्व र मार्गदर्शन अन्तर्गत रहेर हामीले व्यापार पारवाहन लगायत रेल तेल र बिजुलीको दीर्घकालीन नयाँ खाका कोर्न सक्षम भयौं । अन्तर्राष्ट्रिय मंचमा नेपालको इज्जत जोगाउन सफल भयौं ।
पछिल्लो सरकारसंग म त्यति धेरै सन्तुष्ट छैन । पार्टीभित्रको असन्तुष्टिका कारण जनताले आश गरेको काम हुन सकेन । धेरै विवादका बाबजुद दुई वटा कामका निम्ति ओली र एमालेलाई देशले सम्झिनेछ ।
पहिलो काम मधेशमा देखा परेको पृथकतावादी आन्दोलन र विप्लवलाई राजनीतिक मूलधारमा ल्याउने काम पूरा भएको छ । ओलीकै नेतृत्वमा लिम्पियाधुरा समेत समेटेर नेपालले आफ्नो सीमाको रक्षाका निम्ति प्रतिबद्धता व्यक्त गरेको छ । चुचे नक्सा बनाएर त्यसलाई संविधानमा सस्थागत गरेर नेपाल र नेपालीलाई गुण लगाउनुभएको छ ।
यही कारणले मैले साहसिक निर्णयको अपेक्षा गरेको छु । देशलाई संकटबाट बचाउन साहसिक निर्णय गर्नुहोस, शुभकामना छ ।
