नेकपा एमालेका युवा विद्यार्थी नेताहरूले सर्वसम्मत नेतृत्व चयन गर्न माग गर्दै चितवनमा प्रदर्शन गरेका छन् ।
जारी दशौँ महाधिवेशनको सौराहास्थित बन्द सत्रको हल अगाडि युवा विद्यार्थी र नेताहरूले प्रदर्शन गरेका हुन् ।
हिजोदेखि शुरू भएको महाधिवेशन भोलि निर्वाचनसँगै टुंगिनेछ । आज अब केहीबेरमा बन्दसत्र शुरू हुँदैछ ।
पदाधिकारी र केन्द्रीय कमिटीका आकांक्षी धेरै भएपछि एमालेले हिजो मध्यरातमा बैठक बसेर ७ उपाध्यक्ष र तीन महासचिव हुने व्यवस्था गरेको थियो ।
त्यस्तै केन्द्रीय कमिटी ३०१ र ९९ सदस्यीय पोलिटब्यूरो बनाउने निर्णय हिजै मध्यरातमा भएको थियो ।
नेता व्यवस्थापनका लागि केन्द्रीय कमिटी बैठक बसेर कमिटीहरूको आकार बढाउने निर्णय भएको हो ।
पदाधिकारी र केन्द्रीय सदस्यको संख्या बढाएपनि आकांक्षी धेरै भएकाले सर्वसम्मत हुन कठीन बन्दै गइरहेको छ ।
तर अध्यक्ष केपी शर्मा ओलीले सर्वसम्मत ढंगबाट पदाधिकारी चयन गर्ने प्रयास भने जारी राखेका छन् ।
सर्वसम्मत हुन नसके भोलि निर्वाचन गरिने कार्यतालिका रहेको छ ।
