नेकपा एमालेका नेता सुवासचन्द्र नेम्वाङ वरिष्ठ उपाध्यक्षको उम्मेद्वारीको अडानबाट पछि हट्न मानेका छैनन् । चितवनमा जारी महाधिवेशनमा वरिष्ठ उपाध्यक्षको उम्मेदवार बनेका नेम्वाङलाई सर्वसम्मत गर्ने प्रयास स्वरूप राष्ट्रपति बन्न अध्यक्ष केपी शर्मा ओलीले प्रस्ताव गरेका थिए ।
नेम्वाङलाई राष्ट्रपति बनाउने र वरिष्ठ उपाध्यक्षमा ईश्वर पोखरेललाई ल्याउने ओलीको योजनामा नेम्वाङ बाधक बनेका छन् ।
स्रोतका अनुसार ओलीले नेम्वाङलाई वरिष्ठ उपाध्यक्षको दाबी छाडे राष्ट्रपति बनाउने प्रस्ताव गरेका थिए ।
नेम्वाङनिकट स्रोतले भन्यो, ‘अध्यक्ष ओलीले राष्ट्रपतिको उम्मेदवार बनाउने शर्तमा वरिष्ठ उपाध्यक्षको दाबी छोड्न आग्रह गर्नुभएको थियो, तर नेम्वाङले मान्नुभएको छैन ।’
एमालेको विधानअनुसार एकजना वरिष्ठ उपाध्यक्ष बन्ने व्यवस्था रहेको छ । वरिष्ठ उपाध्यक्षका अर्का दाबेदार ईश्वर पोखरेल छन् ।
