नेकपा एमालेका नेता भीम रावलले अध्यक्ष पदमा आफ्नो उम्मेदवारी कायमै रहेको बताएका छन् ।
पार्टीको चालू महाधिवेशनमा सर्वसम्मत ढंगले पदाधिकारी चयन गर्ने प्रयास जारी राखिएको भएपनि रावलले आफूले अध्यक्षको दाबेदारी नछोडेको बताएका हुन् ।
सौराहामा आज बिहानदेखि शुरू हुने भनिएको बन्द सत्र रावललगायतका नेताहरू सहमतिमा आउन नचाहेपछि ढिलो गरेर शुरू हुँदैछ ।
बन्द सत्रमा छिर्ने क्रममा रावलले सञ्चारकर्मीहरूसँग कुरा गर्दै अध्यक्षमा उम्मेदवारी दिने आफ्नो अडान नफेरिएको बताएका हुन् ।
‘विधि र पद्धतिमा अघि बढ्नुपर्छ,’ रावलले भने, ‘म अध्यक्षको उम्मेदवार हो, अहिलेसम्म फिर्ता लिएको छैन ।’
उनले हिजो राति थप गरिएको पदाधिकारी र केन्द्रीय समितिको संख्या पार्टीभित्र छलफल नभईकन गरिएकोसमेत आरोप लगाए ।
त्यस्तै वरिष्ठ उपाध्यक्षका आकांक्षी सुवासचन्द्र नेम्वाङले पनि आफ्नो उम्मेदवारी फिर्ता लिने कुनै छाँटकाँट देखाएका छैनन् ।
सर्वसम्मतिबाट नेतृत्व चयन गर्ने प्रक्रिया नेताहरूको अडानका कारण निर्वाचनसम्म पुग्ने देखिएको छ ।
