स्वास्थ्य तथा जनसंख्यामन्त्री विरोध खतिवडाको निर्देशन पछि शहिद गंगालाल हृदयरोग केन्द्र बाँसबारीले पीसीआर परिक्षण शुल्क घटाएको छ । यसअघि पिसीआर परिक्षण शुल्क १७ सय रुपैयाँ लिंदै आएको अस्पतालले शुल्क घटाएर अन्य सरकारी अस्पताल सरह १ हजार रुपैंयाँ कायम गरेको हो ।
सरकारी र नीजि स्वास्थ्य संस्थामा पीसीआर परीक्षण बापत लिइएको शुल्कमा एकरुपमा कायम गर्न र गंगालालमा पनि अन्य सरकारी अस्पताल सरह शुल्क निर्धारण गर्न मन्त्री खतिवडाले निर्देशन दिएका थिए ।
गंगालाल अस्पतालले पीसीआर परिक्षण शुल्क महँगो लिएको भन्दै सर्वत्र जनगुनासो बढेपछि मन्त्री खतिवडाले अन्य सरकारी अस्पताल झै एकरुपता र सुलभ मुल्य कायम राख्न निर्देशन दिएको प्रेस संयोजक शन्तराम विडारीले जानकारी दिए । उनका अनुसार स्वास्थ्य मन्त्रीको निर्देशन र अस्पतालका कार्यकारी निर्देशक डा. चन्द्रमणी अधिकारीको तत्परतापछि आवश्यक प्रक्रिया पुरा गरेर सोमबारबाटै लागु हुनेगरी परिक्षण शुल्क तोकिएको छ ।
मुटुको शल्यक्रिया गर्ने विरामीहरुको पिसीआर गर्दा शुल्क एक हजार मात्र लिन मिल्न गरी विलीङ र सफ्टवेयर प्रणाली सोमबारबाटै कार्यान्वयनमा आएको र यसले सर्वसाधारणलाई राहत पुगेको स्वास्थ्यमन्त्रीको सचिवालयले जनाएको छ । सरकारी अस्पतालहरुमा इमरजेन्सी सेवा निशुल्क, सर्वसाधरणको सहज पहुँच र सेवा सुविधा पारदर्शी गर्ने सम्वन्धमा पनि छिट्टै निर्णय हुने बताइएको छ ।
अहिले केन्द्रीय प्रयोगशाला टेकु, वीर, सिभिल लगायतका सरकारी अस्पतालहरुमा परिक्षण शुल्क रु. १ हजार कायम गरिएको छ भने विदेश जानेहरुका लागि त्रिभुवन विमानस्थल परिसरमा निजि संस्थाले १ हजार दुईसय रुपैंयाँ लिइरहेका छन् ।
