कर्णाली प्रदेशका मुख्यमन्त्री जीवनबहादुर शाहीले आज विश्वासको मत लिने भएका छन् । मंगलबार दिउँसो १ बजेका लागि बोलाइएको कर्णाली प्रदेश सभाको बैठकबाट उनले विश्वासको मत लिने तयारी गरेका हुन् ।
मुख्यमन्त्री नियुक्त भएको ३० दिनभित्र प्रदेश सभाबाट विश्वासको मत लिनुपर्ने संवैधानिक व्यवस्था अनुसार उनले मत लिन लागेका हुन् ।
माओवादी केन्द्रका नेता एवं पूर्व मुख्यमन्त्री महेन्द्रबहादुर शाहीले सत्ता छाडेपछि कांग्रेस संसदीय दलका नेता शाही कात्तिक १६ गते मुख्यमन्त्रीमा नियुक्त भएका थिए ।
सत्ता गठबन्धनसँग प्रदेश सभामा २३ मत रहेको छ । प्रदेश सभामा हाल कायम ३५ सदस्यमध्ये विश्वासको मतका लागि १८ जना आवश्यक पर्छ । माओवादी केन्द्रको १२, कांग्रेसको ६ र समाजवादीका ३ जना सांसद रहेका छन् ।
आज बस्ने प्रदेश सभा बैठकमा प्रमुख प्रतिपक्षी दल नेकपा एमाले भने अनुपस्थित हुने भएको छ । सांसदहरू पार्टीको १०औं राष्ट्रिय महाधिवेशनमा सहभागी हुन गएकाले एमाले अनुपस्थित हुने जनाइएको छ ।
शाहीले प्रमुख प्रतिपक्षको अनुपस्थितिमा नै संसद चलाउने र विश्वासको मत लिने तयारी गरेका हुन् ।
