राष्ट्रिय प्रजातन्त्र पार्टी (राप्रपा)को अध्यक्षमध्यका एक पशुपति शमशेर राणाले भोलीदेखि हुने पार्टीको महाधिवेशनमार्फत सर्बसम्मत नेतृत्व चयनमा जोड दिएका छन् । मंगलबार पार्टी कार्यालय चाबहिलमा पत्रकार सम्मेलन गर्दै राणाले सर्वसम्मत नेतृत्व चयनका लागि पहल गर्ने बताउँदै महाधिवेशनको निर्वाचन प्रक्रियाबाट आफू अलग रहेको घोषणा गरेका हुन् ।
राणाले पार्टी एकता सर्वोपरी सत्य बनेको भन्दै नेतृत्वको रस्साकसीमा फेरि पनि टुट र फुटको श्रृङ्खला दोहोरिन नदिन कुनैपनि उम्मेदवारलाई आफ्नो समर्थन नरहने स्पष्ट पारे । उनले भने– ‘देशव्यापी सद्भावना र समर्थनका बाबजुद, पार्टीको एकता र बृहत्तर हितका लागि निर्वाचन प्रक्रियाबाट अलग रहने मैले निधो गरेको छु । सहमति र सर्वसम्मतिका आधारमा पार्टी नेतृत्व चयन होस् भन्ने मेरो जोड छ । उनले राप्रपाको सार्थक निरन्तरता, एकता र सर्वसम्मतिका लागि आफ्नो भूमिका र सहयोग अनवरत रहने पनि बताए ।
राप्रपाको नयाँ नेतृत्वका लागि कमल थापा र राजेन्द्र लिङ्नदेले उम्मेदवारी घोषणा गरिसकेका छन् । अर्का अध्यक्ष डा. प्रकाशचन्द्र लोहनीले पत्रकार सम्मेलन नै गरेर लिङ्देनलाई सघाउने घोषणा गरेका छन् ।