प्रधानमन्त्रीको जिम्मेवारीमा रहेका नेपाली कांग्रेसका सभापति शेरबहादुर देउवाले भर्चुअल माध्यमबाटै प्रदेश नम्बर–१ को अधिवेशन उद्घाटन गरेका छन् । देउवाले सातै प्रदेशको अधिवेशनको भर्चुअल माध्यमबाटै गर्ने कार्यक्रम रहेको छ ।
सभापति देउवाले नै भर्चुअल माध्यमबाट अधिवेशनको उद्घाटन गर्ने भनेपछि हिजो तोकिएको प्रदेश अधिवेशन उद्घाटन स्थगित गरिएको थियो ।
देउवाले कांग्रेसले गरेका ठूलठूला संघर्षको परिणामस्वरूप आएको संघीयताअनुरूपको पहिलो प्रदेश अधिवेशन उद्घाटन गर्न पाउँदा मलाई खुसी लागेको बताए । उनले भने, ‘आगामी केही महिनामै स्थानीय तह निर्वाचनमा जानुपर्ने भएकाले संयमित र अनुशासित भएर आन्तरिक लोकतन्त्रको अभ्यासमा भाग लिनुहोला ।’
सभापति देउवाले पार्टीका सबै नेता कार्यकर्ताहरूलाई एकढिक्का भएर जनताको विश्वास जित्ने गरी चुनावमा केन्द्रित हुन निर्देशनसमेत दिए । उनले भने– ‘केही महीनामै स्थानीय तहको निर्वाचनमा जानेछौं । एक वर्षभित्र संघ र प्रदेशको निर्वाचनमा जानेछौं, त्यसैले हामी महाधिवेशनपछि तीनै तहका चुनाव केन्द्रत हुनुपर्छ ।’
देउवाले प्रदेश–१ अधिवेशनको पूर्ण सफलताको कामना गर्दै मन्तव्य अन्त्य गरेका थिए ।