पछिल्लोपटक अफ्रिकामा देखा परेको कोरोना भाइरसको नयाँ भेरियन्ट ओमिक्रोन विस्तारै विश्वव्यापी रुपमा फैलिन थालेको छ । हालसम्म नयाँ भेरियन्ट मानिएको ओमिक्रोन ३३ भन्दा बढी देशहरुमा देखापरिसकेको छ ।
नयाँ भेरियन्ट ओमिक्रोन अहिले श्रीलंकामा पनि देखा परेको छ । श्रीलंकाको स्वास्थ्य मन्त्रालयले सो कुराको जानकारी दिएको हो । सो मन्त्रालयका अनुसार नाइजेरियाबाट केही दिन अघि श्रीलंका आएका एकजना व्यक्तिमा ओमिक्रोन भाइरस देखिएको बताइएको छ ।
उनलाई हाल क्वारेन्टिनमा राखिएको छ । यहीँ उनको उपचार भइरहेको बताइएको छ । तर पनि उनको अवस्था भने त्यति गम्भीर नरहेको बताइएको छ ।
अमेरिकाको न्युयोर्क सहरका पनि बिहीबार एकैदिन ५ जनामा सो भाइरस भेटिएको अमेरिकी स्वास्थ्य अधिकारीहरुले बताएका थिए ।
उनीहरुले यो नयाँ भेरियन्ट गत बुधबार मात्र अमेरिकाको क्यालिफोर्नियामा पत्ता लागेको पाइएको बताएका थिए । यही नोभेम्बर २२ मा दक्षिण अफ्रिकाबाट आएका एक जना व्यक्तिमा सो भेरियन्ट देखिएको बताइएको थियो । यो भाइरस केही दिनमा नै विश्वका विभिन्न देशमा देखिइसकेको छ ।
