पूर्वमन्त्री एवं नेपाली कांग्रेसका केन्द्रीय सदस्य महेश आचार्यले १४औं महाधिवेशनमा उपसभापतिमा उम्मेदवारी दिने घोषणा गरेका छन् । आचार्यले विराटनगर पुगेर कांग्रेसलाई विचारशून्य अवस्थाबाट मुक्त गराउन भन्दै उपसभापतिका लागि उम्मेदवारी घोषणा गरेका हुन् ।
बिराटनगरमा पत्रकारहरुसँग कुराकानी गर्दै आचार्यले कांग्रेस विधानले उपसभापतिलाई नीति, अनुसन्धान र प्रशिक्षण प्रतिष्ठानको जिम्मेवारी तोकेको भन्दै कांग्रेसलाई वैचारिक रुपमा बलियो बनाउन आफू सक्रिय रहने बताए ।
उनले लामो समय कांग्रेस केन्द्रीय समितिमा काम गरेको अनुभवलाई उपसभापतिका रुपमा प्रयोग गर्ने बताए । आचार्यले भने– ‘कांग्रेसमा विचार र नीतिका कुरा हुन छाडेका छन् । विचारको जगमा मात्रै कुनै पार्टी बलियो हुन्छ । मेरो उम्मेदवारी कांग्रेलाई सैद्धान्तिक र वैचारिक रुपमा बलियो बनाउनका लागि हो ।’
उनले कांग्रेसमा सभापति जो निर्वाचित भएपनि विचारप्रधान कार्यक्रम अघि सार्नुपर्ने बताए । आफूले सबै नेतासँग परामर्श गरिरहेको भन्दै नेता आचार्यले सभापति जो बनेपनि आफूले सहकार्य गरेर काम गर्ने बताए ।