भारत र रुसबीच भारतमा एके २०३ राइफल बनाउने कारखाना खोल्ने सहमति भएको छ ।
भारत र रूसका रक्षामन्त्रीद्वय राजनाथ सिंह र सर्गेई सोइगुले सोमवार रक्षा सम्झौतामा हस्ताक्षर गरेका थिए ।
सम्झौताअनुसार सन् २०२१ देखि लिएर २०३१ सम्म ६ लाख एके २०३ राइफल भारतले किन्नेछ । त्यसका लागि रूसले भारतको अमेठीमा कारखाना बनाएर हतियार उत्पादन गर्नेछ ।
रुसका राष्ट्रपति भ्लादिमिर पुटिनले भारत भ्रमण गर्नुभन्दा केही पहिला यस्तो सम्झौतामा हस्ताक्षर भएको हो । यसबाहेक रुसको ‘कालाशानिकोभ’ सिरिजको सानो हतियार पनि भारतले सहयोगस्वरूप प्राप्त गर्नेछ ।
सम्झौतापछि रक्षामन्त्री सिंहले भने, ‘भारत रुससँग द्विपक्षीय सम्बन्ध मजबुत बनाउन रक्षा सहयोग एउटा स्तम्भ हो ।’ उनले सहयोगका लागि रुसलाई धन्यवाद पनि दिए ।
आजै सोमवार पुटिनले भारत भ्रमण गर्नेछन् । उनले केही घण्टा मात्र भारतमा बिताउनेछन् तर भारतीय सञ्चारमाध्यमहरूले पुटिनको यो भ्रमण निकै महत्त्वपूर्ण रहेको बताएका छन् ।
पुटिन र भारतीय प्रधानमन्त्री नरेन्द्र मोदीबीच थप १० सम्झौता हुने बताइएको छ ।
