नेपाली कांग्रेसका सहमहामन्त्री प्रकाशशरण महतद्वारा लिखित ‘नेपाली कांग्रेस एण्ड नेसन बिल्डिङ’ पुस्तक विमोचनका क्रममा बिहीवार सार्वजनिक उपस्थिति देखाएका सभापति शेरबहादुर देउवाको अनुहारमा एककिसिमको चमक र हाँसो देखिन्थ्यो ।
१४ औं महाधिवेशनमा सभापति चुनिएर अर्को एक कार्यकाल कांग्रेसको नेतृत्व गर्ने आकांक्षा राखेका देउवाको अनुहारमा मुस्कान आउनुको एउटै कारण छ – त्यो हो आफूइतर गठबन्धनबाट अहिलेसम्म सभापतिका लागि साझा उम्मेदवार छनोट हुन नसक्नु ।
१३ औं महाधिवेशनमा देउवाविरुद्ध गठबन्धन बनाएर चुनावमा होमिएका रामचन्द्र पौडेलको समूहले महाधिवेशनको अघिल्लो दिनसम्म पनि साझा उम्मेदवार दिन सकेको छैन । देउवालाई जसरी पनि नेतृत्वबाट विस्थापित गर्ने रणनीतिका साथ अघि बढेको पौडेल समूहमा पनि सभापतिका आकांक्षी धेरै भएकाले देउवा खुसी छन् ।
देउवाले कार्यक्रममा सहमतिमै नेतृत्व छानिने र सहमति हुन नसके स्वस्थ प्रतिस्पर्धाबाट नेतृत्व आउने भएकाले नेता कार्यकर्तालाई मनमुटाव नगर्न सुझाव दिए । सभापतिमा ढुक्कले जित्ने संकेत पाएका देउवा बिहीवारको सार्वजनिक कार्यक्रममा हसिलो देखिएका छन् ।
बुधवार र बिहीवार यो समाचार टिप्पणी लेख्दासम्म पौडेल समूहको भाग-दौड लोभलाग्दो छ । वरिष्ठ नेता पौडेलले आजित भएर बुधवार भनेका थिए, ‘यदि सभापतिको उम्मेदवारमा सहमति हुँदैन भने म कांग्रेस छोड्छु । घर गएर बस्छु र महाधिवेशनमा पनि आउँदिन ।’
डा. शेखर कोइराला र प्रकाशमान सिंहबीच सहमति नबन्दा पौडेल विरक्तिएका हुन् । सहमति भए आफू सभापतिको रेसबाट आउट हुने र नभए एक कार्यकाल आफू सभापति बन्नुपर्ने अडानमा छन् पौडेल ।
यता आफूइतर समूहमा सहमति हुन नसक्दा देउवाले निर्वाचनको पहिलो चरणमै आफूले सभापतिमा बाजी मार्ने आंकलन गरेर बसेका छन् । देउवानिकट नै मानिएका विमलेन्द्र निधिले समेत सभापतिमा उम्मेदवारी घोषणा गरिसकेका छन् । निधिलाई पौडेल पक्षले पनि भोट नदिने र देउवा पक्षले देउवालाईं नै भोट दिने भएकाले सभापति बन्न गाह्रो देखिएको छ ।
बुधवार आफूनिकट नेता कार्यकर्तालाई बालुवाटारमा बोलाएर सभापति देउवाले स्थितिको जायजा लिएका थिए । यद्यपि महाधिवेशन शुरू हुन एक दिन बाँकी रहँदासम्म देउवाले औपचारिक रूपमा आफ्नो प्यानल घोषणा गर्न सकेका छैनन् ।
देउवा समूहमा सभापति कन्फर्म भएको छ भने अन्य पदाधिकारीको अहिलेसम्म टुंगो लागेको छैन । पौडेल समूहमा अन्य पदाधिकारीको लगभग टुंगो लागेपनि सभापतिमै सकस देखिन्छ । पौडेल समूहमा हुन नसकेको सहमतिले देउवाको अनुहारमा चमक ल्याइदिएको हो ।
बिहीवार नै स्वर्गीय कृष्णप्रसाद भट्टराईको शालिक अनावरण गर्दै नेता सिंहले आफू कुनै पनि हालतमा सभापतिको उम्मेदवार बन्ने अडान दोहोर्याएका छन् । यता शेखर कोइरालाले पनि भित्रभित्र आफ्नो तयारी कायमै राखेका छन् ।
संस्थापनइतर पक्षक एकजुट नभएर चुनावमा जाने स्थिति आयो भने देउवाले सहजै सभापतिमा बाजी मार्ने पछिल्लो अंकगणितले देखाएको छ ।
