दाङमा ट्राफिक नियम विपरित सवारी चलाउने १४ हजार बढी चालक कारबाहीमा परेका छन् ।
जिल्ला ट्राफिक प्रहरी कार्यालय दाङको तथ्यांक अनुसार चालु आर्थिक वर्षको चार महिनाको अवधिमा ट्राफिक नियम विपरित सवारी चलाउने १४ हजार बढी चालक कारबाहीमा परेका हुन् ।
सिट क्षमताभन्दा बढी सवारी राख्ने, सिट बेल्ट नबाधि सवारी चलाउने, सवारी चलाउँदा फोनको प्रयोग गर्ने, मादक पदार्थ सेवन गरेर सवारी चलाउने , तिब्र गतिमा सवारी हाँक्ने , सावरी चालक अनुमतिपत्र बिना सवारी चलाउने र साथमा सवारी साधनको कागजपत्र नबोक्ने सवारी चालकलाई कारबाही गरिएको जिल्ला ट्राफिक प्रमुख थम्मन जिसीले जानकारी दिए ।
चार महिनामा मापदण्ड विपरित सवारी चलाउनेबाट ९२ लाख बढी राजश्व संकलन भएको छ । चालु वर्षको साउनदेखि कार्तिक मसान्तसम्म ट्राफिक नियम उल्लंघन गर्ने १४ हजार ७ सय सवारी चालकबाट ९२ लाख ६४ हजार राजश्व संकलन भएको छ । जिल्लामा चालु वर्षको कार्तिक महिनामा सबैभन्दा बढी सवारी चालक कारबाही परेका छन् ।
कार्तिक महिनामामात्रै ४ हजार २ सय सवारी चालक कारबाहीमा पर्दा २५ लाख ९८ हजार ५ सय राजश्व संकलन भएको छ । साउन महिनामा ३ हजार १५० सवारी चालकबाट २० लाख २७ हजार, भदौ महिनामा ४ हजार ५० सवारी चालकबाट २५ लाख ६८ हजार र असोज महिनामा ३ हजार ३ सय चालकबाट २० लाख ७० हजार ५ सय राजश्व संकलन भएको जिल्ला ट्राफिक प्रहरी कार्यालय दाङका प्रमुख जीसीले जानकारी दिए ।
चार महिनाको अवधिमा सबैभन्दा बढी मोटरसाइकल चालक कारबाहीमा परेका छन् । जिल्लामा चार महिनाको अवधिमा ट्राफिक नियम उल्लंघन गर्ने ५ हजार ४७३ सवारी चालकबाट ३६ लाख ५७ हजार राजश्व संकलन भएको छ । त्यस्तै ३ हजार ३१२ सवारी चालककबाट २१ लाख १३ हजार , १ हजार ७ सय ४० जिप, कार चालकबाट १० लाख ३३ हजार, १ हजार ५ सय २४ बस चालकबाट ८ लाख ६९ हजार ५ सय राजश्व संकलन भएको छ ।
त्यस्तै १ हजार ३९२ टेम्पोबाट ८ लाख ११ हजार र १ हजार २ सय ५९ टेक्टरबाट ७ लाख ८० हजार ५ सय राजश्व संकलन भएको ट्राफिक प्रहरीले जनाएको छ । गतवर्ष यसै अवधिमा अर्थात् साउनदेखि कार्तिक मसान्तसम्म १६ हजार सवारी चालक कारबाहीमा गरेको ट्राफिक प्रहरीको तथ्यांक छ ।
