पहिलो चरणमा सभापतिका उम्मेदवार रहेका विमलेन्द्र निधिले पनि दोस्रो चरणको चुनावमा शेरबहादुर देउवालाई समर्थन गर्ने भएका छन् ।
यसअघि प्रकाशमान सिंहले पनि आफ्नो समर्थन देउवालाई रहने बताइसकेका छन् ।
निधि र सिंहको समर्थनसँगै सभापतिमा देउवाको जित निश्चित भएको छ । सभापतिमा निर्वाचित हुनका लागि देउवालाई ८२ मतको कमी भएपछि पुनः मतदान हुने भएको छ ।
कांग्रेस निर्वाचन समितिका अनुसार देउवाले २२५८ मत प्राप्त गरेका हुन् । खसेको मतको ५० प्रतिशत कटाउनुपर्ने विधानको व्यवस्था छ। सोमबार भएको निर्वाचनमा ४६७९ मत खसेको थियो। सभापतिमा निर्वाचित हुन २३४० मत आवश्यक थियो।
देउवाका प्रतिस्पर्धी शेखर कोइरालाले १७०२ मत पाएका छन् । निर्वाचन समितिका अुनसार पहिलो चरणबाटै आउट भएका सिंहले ३७१ मत पाएका छन् । अब सिंह र निधिले देउवालाई समर्थन गरेको अवस्थामा उनले जित्ने निश्चित भएको छ ।
सभापतिका अर्का प्रत्यासी विमलेन्द्र निधिले २५० मत र कल्याणकुमार गुरुङ्गले २२ मत पाएका छन् । पहिलो चरणको चुनावमा ७६ मत बदर भएको छ ।
यसले पार्टीको नेतृत्व गर्ने शेखर कोइरालको प्रयास विफल हुने भएको छ ।
दोस्रो चरणको चुनावका लागि मंगलबार दिउँसो ३ः३० बजेदेखि बेलुका ७ः३० बजेसम्म मतदान हुने भएको छ ।
