नेकपा एकीकृत समाजवादीका अध्यक्ष माधवकुमार नेपाल पनि सहभागी हुने भएपछि प्रधानमन्त्री शेरबहादुर देउवाले बोलाएको सर्वदलीय बैठकमा नेकपा एमाले नजाने भएको छ ।
प्रधानमन्त्री देउवाले संसदमा जारी अवरोध, अमेरिकी सहायता परियोजना (एमसीसी)लगायतका विषयमा छलफल गर्न आइतवार बालुवाटारमा सर्वदलीय बैठक बोलाएका थिए ।
‘हामीले मान्यता नदिएका दलहरू बैठकमा उपस्थित भएदेखि हामी कसरी बैठकमा जाने,’ एमाले महासचिव शंकर पोखरेलले भने ।
यही ६ गते बस्ने भनिएको प्रतिनिधि सभाको बैठकमा सरकारले एमसीसी पेश गर्ने तयारी गरेको छ । त्यसअघि सबै दलसँग सहमति जुटाउन देउवाले सर्वदलीय बैठक आयोजना गरेका हुन् ।
बैठकका बारेमा शुक्रवार देउवाले माओवादी केन्द्रका अध्यक्ष पुष्पकमल दाहाल ‘प्रचण्ड’सँग परामर्श गरेका थिए ।
यसअघि सभामुख अग्निप्रसाद सापकोटाले बोलाएको सर्वदलीय बैठकमा पनि एमालेको सहभागिता थिएन ।
