नेकपा माओवादी केन्द्रका अध्यक्ष पुष्पकमल दाहाल प्रचण्डले पार्टीको आठौं महाधिवेशनलाई सम्बोधन गर्दै अमेरिकी सहयोग परियोजना मिलेनियम च्यालेन्ज कम्प्याक्ट (एमसीसी) सम्झौता विना संसोधन पारित गर्न नसकिने बताएका छन् ।
महाधिवेशनको बन्दसत्रमा वैचारिक राजनीतिक प्रतिवेदन पेश गर्दै प्रचण्डले एमसीसी सम्झौता संसोधनसहित राष्ट्रिय हित अनुकुल बनाएर पारित गर्नुपर्ने बताएका हुन् ।
आइतबार माओवादी केन्द्रको महाधिवेशनको उद्घाटनसत्रमा प्रधानमन्त्री शेरबहादुर देउवाले एमसीसी राष्ट्रिय हित अनुकुल नै भएको दावी गरेकै भोलिपल्ट प्रचण्डले संसोधन नगरी कुनैपनि हालतमा संसदबाट पास नहुने प्रष्ट पारे ।
बन्दसत्रमा सहभागि एक प्रतिनिधिका अनुसार यथास्थितिमा एमसीसी पास गर्नु राष्ट्रिय हित प्रतिकुल हुने भन्दै प्रचण्डले परिमार्जन गर्नुपर्ने बताएका हुन् ।
कमलादीस्थित नेपाल प्रज्ञा प्रतिष्ठानको सभाहलमा भइरहेको बन्दसत्रमा उनले २ घण्टा १५ मिनेट लगाएर प्रतिवेदन वाचन गरेका थिए ।