बुटवलबाट शव बोकेर पाल्पाको रिडीमा अत्येष्टिका लागि हिँडेको बस आइतबार बिहान साढे १० बजे पाल्पाको रिब्दिकोट गाउँपालिका–२ लघुवामा दुर्घटना हुँदा सात जनाको घटनास्थलमै ज्यान गएको छ । १५ जना घाइते भएका छन् ।
तानसेन–तम्घास सडकखण्डको लघुवामा लु१ख ७२७९ नम्बरको बस दुर्घटनामा परेको जिल्ला प्रहरी कार्यालय पाल्पाका प्रमुख प्रहरी उपरीक्षक (एसपी) सन्तोष भट्टराईले बताए ।
अर्घाखाँची मलारानी स्थायी घर भई बुटवल बुद्धनगरमा बस्दै आएका व्यक्तिको शव दहासंस्कारका लागि रिडी लगिँदै थियो ।
दुर्घटनामा मलारानी गाउँपालिका–२ का २५ वर्षीय शंकर विक, २८ वर्षीय भोजेन्द्र विक, बुटवल उपमहानगरपालिका–११ रूपन्देहीका ३२ वर्षीय विजय थापा, बुटवल उपमहानगरपालिका–१७ बस्ने ३० वर्षीय र ४० वर्षीया खुमबहादुर रानाको ज्यान गएको जिल्ला ट्राफिक प्रहरी कार्यालय पाल्पाका प्रमुख ज्ञानप्रसाद ज्ञवालीले बताए । अन्य दुई जनाको सनाखत हुन सकेको छैन ।
बसमा च्यापिएका तीन जना व्यक्तिको शव स्काभेटर प्रयोग गरेर निकालिएको थियो । दुर्घटनामा परी घाइते आठ जनाको लुम्बिनी मेडिकल कलेज प्रभास, पाल्पा र सात जनाको युनाइटेड मिसन अस्पताल तानसेनमा उपचार भइरहेको छ । घाइतेमध्ये एक जना महिलाको अवस्था गम्भीर र अन्यको अवस्था सामान्य रहेको अस्पताल प्रशासनले जनाएकोे छ ।
चिप्लो सडकबाट बस करिब सय मिटर तल खसेर दुर्घटना भएकोे थियो । दुर्घटनापश्चात्, हार्थोक, अर्गली र जिल्लाको प्रहरी टोलीसहित स्थानीय बासिन्दाले उद्धार गरेका थिए । तानसेन–तम्घास सडकखण्डको लघुवा क्षेत्रमा साँगुरो, ओरालो र घुम्ती सडक भएकाले विगतमा पनि दुर्घटना हुने गरेको छ ।
