नेकपा मालेका महासचिव सिपी मैनालीले मिलेनियम च्यालेन्ज कर्पोरेसन (एमसीसी)ले नेपालमा थप वैदेशिक हस्तक्षेप भित्र्याउने दाबी गरेका छन् । संसद्बाट एमसीसी पारित भए नेपालको संविधान भन्दा पनि एमसीसी माथि हुने दाबी गरेका छन् । उनले राष्ट्रघाती भएको जिकिर गर्दै पारित हुन दिनु नहुने बताए ।
नेकपा मालेले बुधबार बुटवलमा आयोजना गरेको कार्यकर्ता भेलामा बोल्दै महासचिव मैनालीले एमसीसी परियोजना सहयोगमा आधारित परियोजना नभई रुस र चीनलाई ठेगान लगाउने अमेरिकाको रणनीतिक योजना मात्रै भएको जिकिर गर्दै मुलुकमा राजनीतिक परिवर्तनका लागि भएका २००७, २०४६ र २०६२/०६३ का आन्दोलनले एकातिर मुलुकमा परिवर्तन गरे पनि सँगैसँगै वैदेशिक हस्तक्षेप भित्र्याएको बताए ।
यदि एमसीसी संसद्बाट पास गरियो भने यसले थप वैदेशिक हस्तक्षेप भित्र्याउने भन्दै अहिलेको संसदीय व्यवस्था फेल भइसकेको जिकिर गरे । अब प्रत्यक्ष निर्वाचित प्रधानमन्त्री र संवैधानिक राष्ट्रपतिको व्यवस्थामा जानुपर्ने बताए।