यही पुस २५ गते बस्ने भनिएको नेकपा माओवादी केन्द्रको केन्द्रीय समिति बैठक स्थगित भएको छ । माओवादी मुख्यालयका कर्मचारी र केही केन्द्रीय सदस्यहरुलाई कोरोना संक्रमण भएपछि माघ ८ गतेसम्मका लागि बैठक स्थगित गरिएको हो ।
माओवादी केन्द्रीय कार्यालयका सचिव श्रीराम ढकालका अनुसार कार्यालयका पाँच जना कर्मचारी र केही केन्द्रीय सदस्यहरुलाई पनि कोरोना संक्रमण पुष्टि भएकाले माघ ८ गतेसम्मलाई बैठक स्थगित गरिएको छ ।
आगामी केन्द्रीय समिति बैठकबाट माओवादी केन्द्रले पदाधिकारी चयन गर्ने भनिएको थियो । काठमाडौंमा यही पुस १० गतेदेखि १७ गतेसम्म चलेको आठौं महाधिवेशन अपुरो केन्द्रीय समिति चयन गर्दै सकिएको थियो ।
त्यसलगत्तै बसेको पहिलो केन्द्रीय समितिको बैठकले अध्यक्षमा प्रचण्डलाई नै चयन गरेको थियो । पदाधिकारीमा बाँकी वरिष्ठ उपाध्यक्ष, उपाध्यक्ष, महासचिव, उपमहासचिव, सचिव र कोषाध्यक्ष चयन गर्न बाँकी नै छ ।
आगामी केन्द्रीय समिति बैठकबाट अपुरो केन्द्रीय समितिलाई पनि पूर्णता दिने माओवादीले जनाएको छ । २९९ सदस्यीय केन्द्रीय समितिमा हाल २३६ जनामात्र छन् ।