नेपाली टिमका क्याप्टेन सन्दीप लामिछाने इन्डियन प्रिमियर लिग (आइपियल)मा अनसोल्ड भएका छन् । शनिबार दिनभर चलेको आइपिएल अक्सनमा सन्दीप अन्तिम नामको रुपमा बोलकबोलमा परेका थिए ।
यसअघि दिल्ली क्यापिटल्सबाट खेलेका सन्दीप अघिल्लो सिजन पनि अनसोल्ड भएका थिए । अघिल्लो सिजनपनि कुनै टिमको मन जित्न नसकेका सन्दीप यो पटक पनि आइपिएल अक्सनमा नबिकेका हुन् ।
हालै मात्र नेपालको कप्तानको जिम्मेवारी पाएका सन्दीप वर्ल्ड क्रिकेटमा स्टार स्पिनरको रुपमा चिनिन्छन् । तर विश्वकै सर्वाधिक महंगो तथा धेरै क्रिकेटप्रेमीको ध्यान खिच्ने फ्रेञ्चाइज लिगमा भने उनले स्थान बनाउन सफल रहेनन् । यद्धपी भोली पुनः अनबिकाउ प्लेयरको सुचीमा नाम आउँदा कुनै न कुनै टिमको नजरमा सन्दीप पर्न सक्ने आशा भने जिवितै छ ।
नेपाली लेग स्पिनर सन्दीप विश्व क्रिकेटमा प्रख्यात गुगली बलिङले चर्चित छन् । हालै मात्र नेपाली टिमको पहिलो पटक कप्तानी निभाएका सन्दीप पहिलो कप्तानीमै सफल भएका थिए । पहिलो खेलमा ओमन विरुद्ध नेपाललाई जित दिलाएका सन्दीपको कप्तानीमा नेपाली टिम दोस्रो खेलमा भने युएईसँग झिनो रन अन्तरमा पराजित भयो ।
