उच्च शिक्षालय तथा माध्यामिक विद्यालय संघ (हिसान)का बरिष्ठ उपाध्यक्ष युवराज शर्माले सरकारले निजी क्षेत्रलाई गाली गर्दै जाँदा, लखेट्दै जाँदा र खुम्च्याउन खोज्दा सरकारी संस्थाहरु, विद्यालयहरु, विश्वविद्यालयहरु खण्डहर हुने अबस्थामा पुगेको बताएका छन् । सुत्र टिभीसँगको भिडियो अन्तर्वार्तामा शर्माले जिर्ण अवस्थामा पुग्न लागेको शिक्षा क्षेत्रलाई बचाउन थोरै भएपनि निजी क्षेत्रको योगदान रहेको बताए ।
जिवनको ३ दशक शिक्षा क्षेत्रमा विताएको भन्दै शर्माले आफ्नो अन्य कुनैपनि उद्योगधन्दामा लगानी नरहेको स्पष्ट पारे । उनले शिक्षामा बाहेक कहिंकतै एक रुपैयाँ पनि लगानी नरहेको भन्दै ३० बर्षको रेकर्ड देखाउन आफु तयार रहेको बताए ।
३० बर्ष शैक्षिक उद्यमशिलतामा विताइसकेका शर्माले अझै दुई दशक शिक्षा क्षेत्रमा नै विताउने योजना रहेको बताए । राज्यले पत्याएको छैन तरपनि सरकारले कुनै विद्यालय, कलेज वा विश्वविद्यालय नै व्यवस्थापन गर्ने जिम्मा दियो भने आफुसँग निजी भन्दा राम्रोसँग चलाउन सक्ने जोश, जाँगर, हिम्मत र क्षमता भएको शर्माले बताए ।
शर्माले प्लस टु कलेज संचालनको लागि सुरुवाती समयमा नाम, डिजाइन, लोगो र प्रचारको शैली फरक ढंगले गरेका थिए । जसका कारण उनी ब्राण्ड मेकरको रुपमा परिचित छन् । उनैले अपनाएको शैली पछ्याउँदै थुप्रै शैक्षिक उद्योगीले प्लस टुको ब्राण्ड बनाए ।
शिक्षा क्षेत्रमा अनवरत रुपमा लागिरहेका र कुनै बेला चर्चाको शिखरमा शर्माले यसबीचमा थुप्रै उतारचढाव व्यहोरेका छन् । उनले शिक्षामा गरेका ठूला लगानीलाई जोगाउन सकेनन् । तर पनि उनि बिचलित भएनन् । अब उनलाई निजी क्षेत्रको लगानी रहेको विश्वविद्यालय संचालन गर्ने धोको छ । यसका लागि उनले आवश्यक पूर्व तयारी गरिरहेको जानकारी दिए ।
शर्मासँग भएको पूरा अन्तर्वार्ता हेर्न र सुन्न तलको भिडियो लिङ्कमा जानुहोस्
