काठमाडौं – प्रतिनिधिसभा र प्रदेशसभा निर्वाचन मंसिर ४ गते एकैपटक गर्ने सरकारले निर्णय गरेसँगै राजनीतिक दलहरु चुनावी तयारीमा लागिसकेका छन् । विभिन्न राजनीतिक दलका नेताहरुले आफूले चुनाव लड्ने स्थानमा उम्मेदवारी घोषणाको कार्यक्रम राख्न थालिसकेका छन् ।
सत्ता गठबन्धन दलहरु पनि स्थानीय तहको चुनाव जस्तै प्रतिनिधिसभा र प्रदेशसभा निर्वाचनको चुनावमा पनि तालमेल गरेर अगाडी बढ्ने निर्ण गरिसकेका छन् । नेपाली कांग्रेस, नेकपा माओवादी केन्द्र, एकीकृत समाजवादी पार्टी लगायतका ५ दलहरु यसपटकपनि चुनावी तालमेल गर्ने निर्णय गरेपनि सिट बाँडफाडको टुँगो भने लागिसकेको छैन ।
आउँदो निर्वाचनमा ५ दलहरुसँग महन्थ ठाकुर नेतृत्वको लोसपा पनि मिसिने तयारीमा छ । त्यति मात्र होइन बाबुराम भट्टराईको नयाँ पार्टी पनि सत्ता गठबन्धनकै पछि लागिरहेको देखिन्छ । यी दुई दलका शिर्ष नेताहरु गठबन्धन दलका नेताहरुसँग भेट गरिरहेका छन् । यता, नेकपा एमाले पनि राष्ट्रिय प्रजातन्त्र पार्टीसँग चु्नावी तालमेलको तयारीमा छ ।
राप्रपाका अध्यक्ष राजेन्द्र लिङ्देन, केन्द्रिय सदस्य रेखा थापाले एमाले अध्यक्ष केपी शर्मा ओलीलाई भेट गरिसकेका छन् । शनिवार बिहान ओलीसँग भेट गर्न अध्यक्ष लिङ्देन ओली निवास बालकोट पुगेका थिए । भेटपछि लिङ्देनले आफूहरुबीच आउँदो चुनावकै बिषयमा कुराकानी भएको बताए । आउँदो निर्वाचनमा राप्रपा अध्यक्ष लिङ्देन झापा ३ बाट लड्दैछन।
सत्ता गठबन्धन दलहरु चुनावी तालमेल गर्दा एमालेलाई धेरै ठाउँमा अफ्ठ्यारो पर्ने सम्भावना देखिएपछि अहिले एमाले नै राप्रपासँग तालमेल गर्न अग्रसर भइरहेको छ । यी दुई पार्टीले नै अहिले एक अर्काको साथ अनिवार्य देखेका छन् । ओली र लिङ्देनबीच सिट बाँडफाडका बिषयमा मात्र कुराकानी भइरहेको छ या एजेण्डाका बिषयमा पनि कुराकानी भइरहेको छ भन्ने धेरैको चासो पनि छ ।
राप्रपाले हिन्दू राष्ट्र र राजसंस्थाको एजेन्डा लिदै आइरहेको छ । यो एजेन्डाका बिषयमा ओलीले लचकता देखाउलान् रु ओलीले हिन्दू राष्ट्रका बिषयमा सकरात्मक भए पनि राजसंस्थामा ध्यान कदापी लादैनन् । सपथ लिंदा ईश्वरको सपश लिन नमान्ने ओलीले राप्रपाको एजेन्डामा सहमती गर्लान् भन्न पनि सकिदैन ।
यसअघि २०७४ सालको चुनावको कुरा गर्दा, राप्रपाले कांग्रेससँग गठबन्धन गरेको थियो । तर ओली र लिङ्देनकै जिल्ला झापामा भने एमाले र माओवादी केन्द्र तथा राप्रपाबीच गठबन्धन भएको थियो । यीनीहरुले एकले अर्कालाई चुनावी तालमेल गरेर सघाएका थिए ।
अहिले पनि झापामै दुवैलाई सहज जितका लागि एकले अर्कालाई सहयोग चाहिने अवस्थामा रहेको छ । राप्रपा अध्यक्षमा लिङ्देन निर्वाचित भएपछि ओली केही समय टाढिएका थिए । त्यति मात्र होइन कांग्रेसको महाधिवेशनमा लिङ्देनले अहिले गाउँघरमा नेताहरुलाई जनताले चोर भन्न थालेको बताएपछि ओलीले जंगिदै सोही मञ्चमै रिसाएका थिए । अहिले अब दुवैलाई चुनावमा एकअर्काको खाँचो छ ।
