काठमाडौं – फिल्म बगानको टिजर र गीत सार्वजनिक गरिएको छ । अभिनेत्री करिष्मा मानन्धर अभिनित यस फिल्मको टिजर र गीत सोमबार काठमाडौंमा पत्रकार सम्मेलन गरी सार्वजनिक गरिएको हो । यस फिल्मबाट अभिनेता सरोज खनालले पहिलो पटक निर्देशनमा हात हालेका छन् ।उनले पत्रकारहरुसँग भने, ‘सामाजिक कथावस्तुमा बगान केन्द्रित छ । म्ूलत यो फिल्मले एकल महिलाले पनि विवाह गर्न पाउनु पर्छ भन्ने मुद्धा उठाएको छ ।’
फिल्ममा सरोजसहित करिष्मा मानन्धर, नीर शाह, बसुन्धरा भुषाल, प्रमिला कार्कीको मुख्य भूमिका रहेको छ । यस्तै समारोहमा बोल्दै करिष्मा मानन्धरले आफूले आमाको रोल निभाएको बताईन् । उनले भनिन्, ‘मेरो जहिल्यै पनि पहिरन र सौन्दर्यताको मात्र चर्चा भयो । अभिनय भने ओझेलमा परिरह्यो । यस फिल्मबाट अभिनयको पनि चर्चा हुने आश लिएको छु ।’
यता नीर शाहले आफूले कहिल्यै पनि एकल महिलाले दोस्रो विवाह गर्नु हुन्न भन्नेमा ओकालत नगरेको बताए । तर, यो फिल्ममा ठिक अपोजिटमा रहेर काम गरेको भनाइ राखे । यो फिल्म आगामी फागुन १२ गते सार्वजनिक प्रदर्शनमा आउँदैछ ।
