विद्युतीय सवारी साधन तथा यससँग सम्बन्धित उत्पादन गरिएको सामग्रीको बृहत मेला ‘इभि नेपाल एक्स्पो’ हुने भएको छ । एस.डी एक्स्पो मिडियाको आयोजनामा मंसिर १६, १७ र १८ गते काठमाडौंको भृकुटिमण्डपमा एक्स्पो हुने भएको हो ।
यस एक्स्पोलाई विद्धुतिय गाडी र सम्बन्धित उत्पादनहरूको नेपालमा हुन लागेको सबैभन्दा ठुलो प्रदर्शनी भएको आयोजकले जनाएको छ । एक्स्पोको सह–आयोजक इण्डियन इक्जिबिसन सर्भिसेस रहेको छ भने अटो नेपाल, पावर टक, कार रिप, नेपाल अटो ट्रेडर डट कम र इभि ड्राइभ द फ्युचरले सहकार्य गरेका छन् ।
२०२० मा हुनु पर्ने यस प्रदर्शनी कोभिड–१९ (कोरोना) महामारीका कारण २ बर्षपछि हुन लागेको आयोजकले जानकारी दिंदै यस प्रदर्शनीले नेपालमा विद्युतीय गाडीको क्षेत्रलाई प्रोत्साहन गर्दै अहिलेको अवस्थामा प्रभावकारी ढङ्गले व्यापार सञ्चालनमा टेवा पुर्याउनु रहेको बताएको छ । यसका साथै, यस सुन्दर अवसरले पछिल्ला दिनमा विद्युतीय गाडीका क्षेत्रमा भएका विकास र परिवर्तनलाई पनि जनमानसमा सूचित गर्ने विश्वास लिएको छ ।
आयोजकले एक प्रेस विज्ञप्ति जारी गर्दै पछिल्ला दशकहरूमा विद्युतीय गाडीको लोकप्रियता बढ्दो क्रममा रहेको छ । यसका साथै उल्लेखनीय मात्रमा हाइड्रो पावरहरु पनि सञ्चालनमा आएका छन् । यो सन्दर्भमा नेपालले आफ्नो प्राथमिकता विद्युतीय यातायातमा सारेको देखिन्छ । विद्युतीय यातायातको सुविधाले परम्परागत गाडीहरुले निम्त्याउने स्वास्थ्यका साथै जलवायु परिवर्तनका समस्याहरु पनि कम गर्ने जनाएको छ ।
विज्ञप्तिमा विद्युतीय गाडीको प्रयोगले वैकल्पिक ऊर्जाहरूको खपतलाई प्रोत्साहन गर्दै देश भित्रै क्लिन इनर्जिको खपत बढाउँछ । यस प्रदर्शनी विशेष गरि विद्युतीय कार, विद्युतीय स्कुटर र मोटरसाइकल र साइकल, विद्युतीय बस, विद्युतीय ट्रयाक्टर, विद्युतीय कार्गो लोडर, रिक्सा तथा विद्युतीय चार्जिङ स्टेसन, ब्याट्री तथा अन्य विद्युतीय सामाग्रीहरू प्रदर्शनमा राखिने उल्लेख गखिएको छ ।
यस वृहत प्रदर्शनी १५० भन्दा बढि प्रतिष्ठित कम्पनीहरू तथा ५०० भन्दा बढि विभिन्न देशका ब्रान्डका लागि साझा मञ्च हुनेछ । यसका साथै व्यापार तथा वित्तिय क्षेत्रका नेतृत्वकर्ता, अटोमोटिभ सोरुमका सञ्चालक, डिलर, बिक्रेता, आयातकर्ताहरू, सरकारी अधिकारी, कर्पोरेट हाउस, नयाँ लगानीकर्ता लगायत सबैका लागि उपयुक्त थलो हुनेछ ।
एक्स्पोले विद्युतीय गाडीको क्षेत्रमा नयाँ आयाम थप्नुका साथै साझेदारीका लागि नयाँ लगानीकर्ताहरूलाई पनि प्रोत्साहित गर्नेछ । विद्युतीय यातायातका क्षेत्रमा भएका पछिल्ला विकासहरु पनि प्रदर्शनीमा देख्न पाइने बताइएको छ । विद्युतीय यातायातको क्षेत्रमा यस प्रदर्शनीले थप उर्जा प्रदान गर्नेछ विज्ञप्तिमा उल्लेख गरिएको छ ।
