तत्कालीन प्रधानमन्त्री केपी शर्मा ओलीले संसद विघटन गरेपछि नेकपा माओवादीका अध्यक्ष पुष्पकमल दाहाल प्रचण्ड एकाएक रुष्ट बनेका थिए । उनले ओलीसंग भविष्यमा कहिल्यै पनि सहकार्य नहुने भन्दै प्रतिगमनको संज्ञा दिएका थिए ।
हालका नेकपा एकीकृत समाजवादीका अध्यक्ष माधवकुमार नेपाललाई संगै हिंडाएर उनी ओलीविरुद्ध राम्रैसंग खनिएका थिए । त्यसपछि एकाएक नेपाली काँग्रेससँग मिल्न थाले । देउवालाई प्रधानमन्त्री बनाउन सबै सांसदहरुले हस्ताक्षर गरे । देश काँग्रेसको नेतृत्वमा चल्यो । माओवादीले मालदार मन्त्रालय पायो ।
राजनीतिमा जे पनि चल्छ जे पनि हुन्छ । तेस्रो शक्ति बनेर पदको बार्गेनिङ गर्ने भनेर ढुक्कले बसेको माओवादी आज आफ्नो शक्तिमा मुलुकलाई डोर्याउने अवसर पायो ।
प्रत्यक्षमा जम्मा १८ सिट जितेको माओवादीले प्रधानमन्त्री पाउला भनेर कल्पना गरेको पनि थिएन । नेपाली काँग्रेसले आफूलाई प्रधानमन्त्री दिने भन्ने कुराको प्रचण्डले पटकपटक झुटो दाबी गरेका थिए ।
प्रचण्डले नेकपा एमाले र नेकपा एसलाइ देखाउँदै देउवासँग पटकपटक प्रधानमन्त्रीको लागि बार्गेनिङ गरिरहेकै थिए । पटकपटक प्रचण्डको भाषणमा गठबन्धन देशको मुख्य आवश्यकता हो भन्दै भाषण गर्ने प्रचण्ड प्रधानमन्त्री पद पाए जे पनि गर्न सक्छन भन्ने कुराको प्रमाणित भएको छ ।
प्रधानमन्त्री पदकै लागि काँग्रेससँग मिल्ने तर कुरा नमिले आँफैले प्रतिगमनकारीको संज्ञा दिंदै आएको एमालेको समर्थनमा प्रधानमन्त्री बन्नुले प्रचण्डमाथि नैतिक प्रश्नहरु उठेको छ ।
