नेपाली काँग्रेसका सभापति शेरबहादुर देउवाले भन्ने गर्थे, ‘माओवादी केन्द्रसँगको गठबन्धन १५ वर्ष कायम रहन्छ ।‘ लोकतन्त्र बचाउनका लागि आफूहरु मिलेको दाबी पटकपटक गर्दै आएका देउवा-प्रचण्डको जोडी प्रधानमन्त्री पदका कारण फुटेको छ ।
‘ओलीजीले दुई पटक संसद् विघटन गर्नुभयो । संविधानको अङ्ग भङ्ग गर्ने काम गर्नुभयो, हामी संसद्को पूर्ण कार्यकाल राख्न चाहन्छौँ’उनले भने, ‘माननीयहरूले आलोचना गर्ने बित्तिकै ओलीको जसरी संसद् विघटन गर्दैनौँ ।’ देउवाले भन्ने गर्थे ।
देउवाले गठबन्धन १५ वर्षसम्म चल्छ भनेको १५ दिन नबित्दै गठबन्धन भत्कियो ।
देउवा र प्रचण्डमा को पहिला प्रधानमन्त्री बन्ने भन्ने कुरा नमिल्दा प्रचण्ड एमालेसँग मिल्न गए भने देउवाले पार्टीलाई सबैभन्दा ठुलो बनाएर पनि सत्ता हातमा ल्याउन सकेनन् ।
आइतबार प्रचण्डले दोस्रो ठूलो दल नेकपा एमालेसहित सात दल र ३ स्वतन्त्र गरी १६९ सांसदको समर्थन जुटाएर प्रधानमन्त्रीका लागि राष्ट्रपति समक्ष दाबी पेस गरेका थिए ।
उनी नेपालको ४४ औं तथा तेस्रोपटक प्रधानमन्त्री हुन् ।
