स्टार फुटबलर क्रिस्टियानो रोनाल्डोले साउदी अरेबियाको क्लब अल–नासरबाट आफ्नो पहिलो खेल खेल्नको लागि केही समय कुर्नु पर्ने भएको छ ।
रोनाल्डो अहिले इङ्लिस फुटबल संघ (एफए) बाट दुई खेलको प्रतिबन्धको सामना गरिरहेका छन् ।
रोनाल्डोले आफ्नो पहिलो खेल बिहीबार साउदी प्रो लिग क्लब अल-ताईसँग खेल्ने थिए।
३७ वर्षीय रोनाल्डोले यसै साता साउदी क्लब अल–नासरसँग अनुबन्ध गरेका थिए । यसका लागि उनीहरूलाई सन् २०२५ सम्म हरेक वर्ष करिब २० करोड युरो दिइनेछ ।
गत सोमबार साउदी अरेबियाको राजधानी रियाद पुगेका उनलाई भव्य स्वागत गरिएको थियो । भोलिपल्ट अर्थात मंगलबार अल–नसर क्लबको घरेलु मैदानमा उनको विधिवत स्वागत गरिएको थियो ।
रोनाल्डोले आफ्ना नयाँ क्लब साथीहरूसँग प्रशिक्षण सत्रमा पनि भाग लिए। रोनाल्डोले आफ्नो पहिलो खेल शुक्रबार (जनवरी ०६) खेल्नेछन् भन्ने अल-नासरलाई पूर्ण आशा थियो। यो खेलको २८ हजार टिकट पनि बिक्री भएको थियो ।
