काठमाडौं – आइतबार बिहान भएको यती एयरलाइन्सको दुर्घटनाग्रस्त विमानमा चर्चित दोहोरी गायिका निरा छन्त्याल पनि सवार रहेको खुलेको छ । उनी सोही जहाज चढेर पोखरा गएको पारिवारिक स्रोतले जनाएको छ । गायिका छन्त्यालको अवस्थाबारे कुनै आधिकारिक जानकारी भने आएको छैन ।
उनको बारे आधिकारिक जानकारी नआए पनि यात्रुहरूको सूचीमा उनको नाम रहेको छ ।माघे सङ्क्रान्तिका अवसरमा पोखरामा आयोजना हुने कार्यक्रममा सहभागी हुन उनी पोखरा प्रस्थान गरेको बताइएको छ । आफू पोखरा जान लागेको बारे उनले सामाजिनक सञ्जालमार्फत पनि जानकारी गराएकी थिइन् ।
आइतबार बिहान काठमाडौंबाट पोखराका लागि उडेको उक्त विमान सेती खोचमा दुर्घटनाग्रस्त भएको हो ।एयरलाइन्सको एएनसी एटीआर ७२ विमानमा ४ सदस्यसहित ७२ जना सवार रहेका थिए। हालसम्म दुर्घटनाग्रस्त विमानबाट ३२ बढी शव निकालिएको छ । अहिले घटनास्थलमा उद्धार टोलीले उद्धार कार्य जारी राखेको छ ।
