काठमाडौं – गएको शुक्रबारबाट देशभर प्रदर्शनमा आएको दिपकराज गिरी र दिपाश्री निरौलाको फिल्म छक्का पञ्जा–४ ले धमाकेदार कमाई गरिरहेको छ ।
मंगलवारसम्म आइपुग्दा हल भरिभराउ भएपछि शो पनि बढाइएको छ । हेमराज विसीले निर्देशन गरेको यस फिल्मलाई दर्शकले निकै रुचाएका छन् । यस फिल्मले हालसम्म ६ करोड कलेक्सन गरेको बताइएको छ । शनिवार र सोमबार यस फिल्मले दुई दुई करोड कलेक्सन गरेको अनुमान लगाइएको छ ।
फिल्ममा दीपकराज गिरी, दीपाश्री निरौला, केदार घिमिरे, निर्मल शर्मा, बुद्धि तामाङ, स्वस्तिमा खड्का, राज आचार्य, सुष्मा निरौला, वेदना राईलगायत कलाकारको अभिनय छ । फिल्मको कथा दीपकराज गिरीले तयार पारेका हुन् । नरेन्द्र मैनालीले छायांकन गरेको फिल्मलाई निमेष श्रेष्ठले सम्पादन गरेका हुन् ।
दिपेन्द्र खनिया र केशव न्यौपाने निर्माता रहेको फिल्मका कार्यकारी निर्माता केदारप्रसाद घिमिरे र निर्मल शर्मा छन् । आमा सरस्वती मुभिज र आइएमीको प्रस्तुति रहेको छ ।
