काठमाडौं- फेरान टोरेसको निर्णायक गोलप्रेरित बार्सिलोनाले स्पेनिस ला लिगामा एट्लेटिको मड्रिडविरुद्ध १–० को साँघुरो जित निकालेको छ।
उपाधि दौडको शीर्ष स्थानमा रहेको बार्सिलोनालाई घरेलु मैदान क्याम्प नाउमा जित दिलाउन टोरेसले ४४औँ मिनेटमा गरेको गोल निर्णायक बन्यो । यसअघि लगातार दुई बराबरी खेलेपछि लिग उपाधि यात्रामा बार्सिलोनामाथि दबाब थपिएको थियो ।
तालिकाको शीर्ष स्थानमा रहेको बार्सिलोनालाई चिर प्रतिद्वन्द्वी रियाल मड्रिडले पछ्याइरहेको छ । जितसँगै बार्सिलोनाले ३० खेलबाट ७६ अंक जोडेको छ । त्यो दोस्रो स्थानको रियालको भन्दा ११ अंक धेरै हो । ३० खेलबाट रियालको ६५ अंक छ । तेस्रो स्थानमा रहेको एट्लेटिको मड्रिडको ३० खेलबाट ६५ अंक छ ।
लिगमा अब अन्तिम आठ खेल मात्र बाँकी हुँदा बार्सिलोनाले रियाल मड्रिडसँग ११ अंकको दूरी बनाएको हो ।
बार्सिलोनाले अब बुधबार रायो भालेकानोको यात्रा गर्नेछ । एट्लेटिको मड्रिडले सोही दिन मायोर्कालाई घरेलु मैदानमा आतिथ्यता प्रदान गर्नेछ ।
