काठमाडौं- साविक विजेता रियाल मड्रिड मंगलबार राति स्पेनिस ला लिगामा जिरोनासँग ४–२ ले पराजित भएको छ । यससँगै शीर्ष स्थानमा रहेको बार्सिलोनालाई उपाधि होडमा सहज भएको छ ।
बार्सिलोनाले शीर्ष स्थानमा ११ अंकको अग्रता लिएको छ । रियालले ३१ खेलबाट ६५ अंक जोडेको छ भने बार्सिलोनाले ३० खेलबाट ७६ अंक जोडेको छ । क्याटलान क्लब बार्सिलोनाले बुधबार राति रायो भालेकानोलाई पराजित गरेमा १५ अंकको अग्रता बनाउनेछ । त्यतिबेला लिगमा २१ अंकको खेलमात्र बाँकी हुनेछ । पराजित जिरोना भने ४१ अंकका साथ नवौँ स्थानमा छ ।
गएराति घरेलु टोली जिरोनाले १२औँ मिनेटमा भ्यालेन्टिन कास्टेलानोसको गोलबाट अग्रता लिएको थियो । कास्टेलानोसले २४औँ मिनेटमा अग्रता दोब्बर बनाएका थिए । ३४औँ मिनेटमा रियालका भिनिसियस जुनियरले अन्तर कम गरे । ४६औँ मिनेटमा कास्टेलानोसले ह्याट्रिक पूरा गर्दै अग्रता पुनः बढाए । ६२औँ मिनेटमा कास्टेनालोसले चौथो गोल थपे । खेल सकिन पाँच मिनेट बाँकी हुँदा लुकास भाजक्वेजले गरेको गोल रियालका लागि सान्त्वना मात्र बन्यो ।
ला लिगाको उपाधि होडमा कमजोर बनेको रियालले कोपा डेल रे र च्याम्पियन्स लिग उपाधि जित्ने सम्भावना भने कायम छ । रियालले कोपा डेल रेको उपाधिका लागि ७ मेमा ओसासुनासँग प्रतिस्पर्धा गर्दै छ । त्यस्तै च्याम्पियन्स लिगको सेमिफाइनलमा रियालले म्यानचेस्टर सिटीविरुद्ध प्रतिस्पर्धा गर्नेछ ।
रियालका प्रशिक्षक कार्लो एन्सेलोट्टीले यो हारको झट्काले टिमलाई पूर्नजिवित बनाउने बताएका छन् । खेलपछिको पत्रकार सम्मेलनमा यो हार ‘वेक–अप कल’ हुन सक्छ कि भनेर सोधिएको प्रश्नमा एन्सेलोट्टीले भने, ‘‘हो, यो वेक–अप कल हुनसक्छ । तर, हार कहिल्यौं सुखद हुँदैन । म रक्षात्मक प्रतिबद्धताको महत्त्वलाई सधैँ दोहर्याउँछु । यदि हामीसँग त्यो छ भने जित्छौँ । होइन भने हार्छौं । आज हामीसँग रक्षात्मक प्रतिबद्धता थिएन । पछिल्ला सातमध्ये ६ खेलमा हामीले क्लिनसिट राखेका छौँ । आज चार गोल खायौँ । आशा छ मेरा खेलाडीले बुझेका छन् ।’’
गएराति सम्पन्न ला लिगाको अर्को खेलमा चौथो स्थानको रियाल सोसिडाडले पाँचौँ स्थानको रियाल बेटिससँग गोलरहित बराबरी खेल्यो । बराबरीपछि रियाल सोसिडाड ५५ अंकका साथ चौथो स्थानमा छ भने रियाल बेटिस ४९ अंकका साथ पाँचौँ स्थानमा छ ।
