काठमाडौँ- नक्कली शरणार्थी प्रकरणमा पूर्वगृहमन्त्री बालकृष्ण खाण र उनका स्वकीय सचिव नरेन्द्र केसीलाई प्रहरीले बुधबार बिहान पक्राउ गरेर अनुसन्धान जारी राखेको छ। प्रहरीले यी दुवैलाई आवश्यक थुप्रै प्रमाण जुटाएर पक्राउ गरिएको भनेको छ।
खाण र केसीलाई बुधबार पक्राउ गरेर प्रहरीले थप अनुसन्धान गरिरहेकाे छ । प्रहरीका अनुसार खाणविरुद्ध चारवटा बलिया प्रमाण फेला परेका छन्, जसले यो ठगी धन्दामा उनको प्रत्यक्ष संलग्नता देखिन्छ ।
खाँणले आफू गृहमन्त्री हुँदा शरणार्थीसम्बन्धी कार्यदलको गोप्य प्रतिवेदन किर्ते गरेको र ठगीमा सघाएबापत बिचौलियाबाट १ करोड २४ लाख भन्दा धेरै रकम लिएको प्रमाण भेटिएको प्रहरीको दाबी छ ।
यस्तै यही प्रकरणमा पक्राउ गरिएका सचिव टेकनारायण पाण्डेले पनि खाँणलाई बुझाउन बिचौलियासँग रकम लिएको स्वीकार गरेको विषयलाई पनि प्रहरीले बलियो प्रमाण मानेको छ । यसबाहेक विभिन्न मितिमा खाँणले मन्त्रीस्तरिय निर्णय गराएर बिचाैलिया समूहलाई सघाएकाे पुष्टि हुने आधारहरू भेटिएका अनुसन्धानमा संलग्न अधिकारीहरूले बताएका छन् ।
बुधबार पक्राउ परेका तत्कालीन गृहमन्त्री खाँणका स्वकीय सचिव नरेन्द्र केसीले पनि ठगी प्रकरणमा पाँच लाख रुपैयाँ लिएको खुलेको प्रहरीले जनाएकाे छ । यसअघि पक्राउ परेका सचिव टेकनारायण पाण्डेको मोबाइलबाट याे तथ्य उजागर भएकाे प्रहरी दाबी छ । ‘नरेन्द्रले पनि आस गर्छ, त्यसलाई पाँच लाख फालिदिनुपर्ला’ भन्ने च्याट विवरण पाण्डेकाे माेबाइलमा भेटिएकाे छ।
हुन त पाण्डेले पक्राउ पर्नुअघि नै आफ्नो मोबाइल फर्म्याट गरिसकेका थिए । तर प्रहरीले डाटा रिकभर गरेर प्रमाण फेला पारेकाे हाे । प्रहरीले मोबाइलको डाटा रिकभर भएपछि खाँण र पाण्डेबीच भएको गोप्य म्यासेज पढेपछि मात्रै खाँणलाई पक्रेकाे हाे । म्यासेजमा करोडौँ रकम लेनदेनबारे दुई जनाबीच कुराकानी भएको भेटिएको छ । यही प्रमाण खाँणलाई पक्राउ गर्न प्रहरीका लागि पर्याप्त बनेकाे हाे ।
नेपाली नागरिकलाई नक्कली भुटानी शरणार्थी बनाएर अमेरिका पठाउने काण्डको पर्दाफास हुँदा तत्कालीन गृहमन्त्री र गृहसचिव नै अहिले प्रहरी हिरासतमा पुगेका हुन् । आठ सयभन्दा धेरै मानिसलाई ठगी गरी करोडौँ रुपैयाँ उठाएको यो प्रकरणमा पक्राउ पर्ने पूर्वगृहमन्त्री खाँण र नेपाल सरकारका सचिव पाण्डे सबैभन्दा उच्च तहका व्यक्ति हुन् । यो प्रकरणमा पूर्वउपप्रधानमन्त्री टोपबहादुर रायमाझीविरुद्ध पक्राउ पुर्जी जारी भए पनि उनी फरार छन् । खाँण पक्राउ परेसँगै यो प्रकरणमा जोडिएका थप हाई प्रोफाइल व्यक्तिहरू पनि तानिने सम्भावना बढेको छ ।
सचिव पाण्डेलाई खाणकी श्रीमती मञ्जुकै जोड बलले गृहमा ल्याइएको थियो। मञ्जुले पनि यो प्रकरणमा करोडौँ रकमको डिल गरेको अडियो सार्वजनिक भएको छ। प्रहरीले अनुसन्धान जारी रहेको बताएको छ।
