काठमाडौं । प्रधानमन्त्री पुष्पकमल दाहालले आफ्नो भारत भ्रमण नेपाल र नेपाली जनताको पक्षमा नयाँ रेकर्ड बन्ने विश्वास व्यक्त गरेका छन् ।
नेकपा माओवादी केन्द्र निकट अखिल नेपाल ट्रेड युनियन महासंघका नवनिर्वाचित केन्द्रीय सदस्यको शपथ ग्रहण समारोहलाई सम्बोधन गर्दै प्रधानमन्त्रीले त्यही विश्वासका साथ भारत भ्रमणको तयारी भइरहेको बताएका छन् ।
‘हामीले दुई पक्षीय सम्बन्धलाई बलियो पार्ने दुई पक्षीय सहयोगका क्षेत्रहरूलाई नयाँ बनाउने । अहिले मैले धेरै भन्न उचित हुँदैन तर एउटा नयाँ इतिहास यो पटक रचिन्छ होला भन्ने विश्वासको साथ म भारत जाँदैछु । केही नयाँ चिज नेपाललाई प्राप्त हुन्छ र नेपाल भारत सम्बन्धको आयाम पनि नयाँ ठाउँमा पुग्छ भन्ने विश्वास छ ।’ प्रधानमन्त्रीले भनेका छन् ।
प्रधानमन्त्री दाहालले भारतसँग खुला सीमा, आर्थिक, राजनीतिक, सामाजिक, जनता–जनताबीचको सम्बन्धको दृष्टिकोणले सम्बन्ध विशिष्ट रहेको उल्लेख गर्नुहुँदै आगामी भ्रमण दुवै देशका लागि ऐतिहासिक बन्ने बताएका हुन् ।
