अछाममा चट्याङ लागेर चारजना घाइते भएका छन् । अछामको कमलबजार नगरपालिका–१ मा गए राति हावाहुरी र वर्षासँगै परेको चट्याङ लागे ४ जना घाइते भएका हुन् ।
घाइते हुनेमा कमलबजार नगरपालिका–१ का १८ वर्षीया गीताकुमारी रावत विष्ट, ३२ वर्षीय धिर्जा बजगाईँ, ३० वर्षीया सरस्वती बजगाईँ र ५० वर्षीया मोतीकला बजगाईँ रहेका छन् । घाइते मध्ये गीताको अवस्था गम्भीर रहेकाले थप उपचारका लागि नेपालगन्ज रेफर गरिएको इलाका प्रहरी कार्यालय कमलबजारका प्रमुख प्रहरी निरीक्षक भास्कर चन्दले बताए ।
अन्य घाइते तीन जनाको अछाम जिल्ला अस्पतालमा उपचार भइरहेको छ । यस्तै चट्याङ लागेर एक भैँसी पनि मरेको छ । केही घरमा पनि क्षति पुगेको बताइएको छ ।
प्रतिक्रिया दिनुहोस्
