सांसद तथा रास्वपाका सभापति रवि लामिछानले नक्कली भुटानी शरणार्थी प्रकरणमा कसलाई अनुसन्धानमा ल्याउने कसलाई ल्याउने भन्दै शीर्षनेताहरूको कोठे भेटघाटमा निर्धारण गरिएको आशय व्यक्त गर्दै प्रोफाइल नहेर्न आग्रह गरेका छन् ।
सरकारको आगामी वर्षको नीति तथा कार्यक्रममाथिको छलफलमा सहभागी हुँदै बयान र मिडियामा नाम आएका विभिन्न मानिसको बयानसमेत नलिइएको हुँदा अविश्वासको वातावरण सिर्जना भएको बताएका हुन् ।
उनले अपारधिक कार्यमा संलग्नको प्रोफाइल नभई घटनाको फाइल हेरेर अनुसन्धान गर्नसमेत आग्रह गरेका छन् । उनले भने, ‘अपराध अनुसन्धानमा प्रोफाइल हुँदैन, फाइल हुन्छ । काले काले मिलेर खाऊँ भाले भएको हो कि ! यसो हो भने जनताले सहेर बस्दैन।’
साथै नेपालमा उनले न्यायालय र नेपाली सेनामा भएका भ्रष्टाचारबारे मानिसहरू बोल्नै डराएकोसमेत बताएका छन् । साथै संसदमा गम्भीर विषयमा छलफल गर्नुपर्नेमा छेडखानी भएको भन्दै यस्ता गफ तथा आरोपका लागि चिया पसलमा जानू भन्दै नेताहरूलाई व्यंग्यसमेत गरेका छन् ।
“यो ३० वर्षको मूल्याङ्कन गर्न संसद्मा उभिएर तपाइहरूले एक अर्कालाई छेडखानी गर्नुपर्दैन । एक अर्काको घरमा गएर चिया खाएर कुराकानी गर्नुहोस् । यो महत्त्वपूर्ण संसद्लाई त्यसको दुरुपयोग नगर्नुहोस्,” उनले भने ।
