राष्ट्रिय स्वतन्त्र पार्टी (रास्वपा)का सांसद सन्तोष परियारले नयाँ शिराबाट विकासको बहसलाई अगाडि बढाउनुपर्ने भन्दै नीति कार्यक्रममै भ्रष्टाचार विरोधी अभियान आवश्यक रहेको बताएका छन् ।
शनिबार प्रतिनिधिसभाको बैठकमा आगामी आर्थिक वर्षको नीति तथा कार्यक्रममाथिको छलफलमा भाग लिँदै उनले भने, ‘….विगतमा हामीले विकासका कुराहरू कति गर्यौँ होला ? यहाँनेर भन्नुपर्छ, अब हामीले बुझेको विकासलाई अब पुनः परिभाषित गर्नुपर्छ ।’
विकासको अवधारणा नै परिवर्तन गरेर जानुपर्नेमा जोड दिँदै सांसद परियारले प्रश्न गरे, ‘यो औपनिवेशिक विकास र आधुनिकीकरणले गाँजेको विकासले के हाम्रो जनजीवनलाई छुन सक्यो ? विकास अन्य प्रारूप देख्न सकेनौं ?’
सबैभन्दा धेरै भ्रष्टाचार विकासका कार्यक्रम र विकासका परियोजनामा भएको भन्दै उनले नीति कार्यक्रममै भ्रष्टाचार विरोधी अभियान घोषणा गरेर जानुपर्ने बताए ।
साथै सरकारको आगामी आर्थिक वर्षको नीति तथा कार्यक्रमले १३ प्रतिशत दलितलाई छुन नसकेको बताएका छन् । ‘नीति तथा कार्यक्रमले १३ प्रतिशत दलितलाई छुन सकेन’, उनले भने, ‘राज्य व्यवस्थामा अंशियार नै खोज्ने भए पनि १३ प्रतिशत चाहिन्छ । यहाँ कार्यक्रममा कनि आउन सकेन ?’
