शाहरुख खानका फ्यानहरु उनको ‘जवान’को प्रतिक्षामा छन् । यो चलचित्र यसअघि जुनमा रिलिज हुने भनिएपनि अहिले मिति थपिएको छ ।
यसैबीच ‘पठान’मा सलमान खानजस्तै ‘जवान’मा कुन स्टारले केमियो गर्ने भन्ने अड्कलबाजी चलिरहेको थियो । अब यसको पनि टुङ्गो लागेको छ।
‘पठान’ हिट भएदेखि नै बलिउड स्टारहरूले आफ्नो सिनेमामा अर्को स्टारको केमियो रोल सफलताको ग्यारेन्टी भएको ठान्छन्। ‘पठान’मा शाहरुखसँग सलमान खानको केमियो रोललाई दर्शकले निकै रुचाएका थिए । अब सबैको नजर शाहरुखको अर्को सिनेमा ‘जवान’मा छ ।
यस सिनेमामा उनको साथमा को को केमियो गर्ने भनेर लगातार खबर आएको थियो । पछिल्ला केही महिनामा शाहरुख स्टारर यो सिनेमामा धेरै कलाकारको केमियो गर्ने खबर आएको थियो।
सिनेमालाई दक्षिणका एट्लीले निर्देशन गर्दैछन् । यस्तो अवस्थामा बलिउड स्टारका साथसाथै साउथ स्टारहरुको नाम पनि अगाडि आएको थियो । तर अब सञ्जय दत्त ‘जवान’मा केमियो रोलमा देखिने पक्का भएको छ ।
शाहरुखसँगै ‘जवान’मा साउथका सुपरस्टार नयनतारा र विजय सेतुपति पनि छन्। यसअघि ‘जवान’मा ‘पुष्प’ फेम अल्लु अर्जुनको व्यापक चर्चा थियो। तर खबर धेरै समय टिकेन।
यस्तो अवस्थामा ‘जवान’मा कसले ‘केमियो’ गर्ला भन्नेमा विभीन्न अड्कलहरु भएको भएपनि अब त्यसको टुङ्गो लागेको छ। ‘पठान’पछि शाहरुख खान ‘जवान’मा नयाँ अवतारमा देखिनेछन् । सिनेमामा उनको दोहोरो भूमिका छ ।
‘जवान’मा दीपिका पादुकोण पनि महत्वपूर्ण भूमिकामा छिन् । सिनेमा सेप्टेम्बरमा रिलिज हुनेछ ।
